Hugsanaflækja

Nýtt blogg

2006-08-14T14:09:00.000Z

Kæra fólk

Ef ykkur langar að lesa fréttir af mér, þá hef ég ákveðið að færa mig um set.

Kíkjið endilega á mig á www.123.is/sifjo

Þeir sem hafa hlekkjað inn á mig mættu gjarnan setja þennan nýja hlekk.

Sjáumst.

Sif

Gripurinn

2006-07-31T23:12:00.000Z

Arnar fór áðan og sótti kaffivélina, öllum boðið í kaffi til mín. Fæ til mín kaffisnilling til að kenna mér almennilega að flóa mjólk og svona og svo verða bara lattear framleiddir í massavís.

Hér getið þið barið gripinn augum http://www.ht.is/index.php?sida=vara&vara=EAM3400

Undarlegt nokk, þá er ég farin að hlakka til vetrarins að sumu leyti. Dimm helgarkvöld með kertaljósi og mínum heittelskaða. Te í bolla eða latte í bolla. Jólin. Og svo auðvitað sú staðreynd að ég yfirgef landið eftir áramót á vit ævintýranna í Barce. Ógó skemmtilegt myndi S(auður) segja.

Var ég búin að segja ykkur að lífið er dásamlegt? Þvi það er það, í alvöru!!!

Næsta helgi verður farið norður í land aftur. Elska Akureyri. Finnst hún hafa mikið af þeim sjarma sem mér finnst vanta í Reykjavík, samstæð byggð, fallega viðhaldin gamli bær með upprunalegum húsum. Garðar í fallegri rækt o.s.fr. Svo klikkar ekki að fá sér Brynjuís, norðfirskt kaffi hjá Te og Kaffi og skella sér svo á Bautann í góðan fisk eða annað gúmmulaði. Gæti vel hugsað mér að flytjast þangað búferlum eins og eitt sumar. Hver veit nema að sá draumur verði að veruleika einhvern tímann.

Vá!

2006-07-31T11:49:00.000Z

Komin heim aftur eftir algjöra snilldar helgi. Keyrðum í góðum félagsskap norður á fimmtudagskvöldið. Mættum á svæðið um tvö leytið um morguninn og ákváðum að tjalda frekar í Kjarnaskógi en annars staðar svona til að fá útilegu fíling og svona. Sáum ekki eftir því enda yndislegt tjaldsvæði. Á föstudeginum var svo heitasti dagur á Akureyri og við létum okkur ekki vanta, tékkuðum á sýningu Louisu á Listasafninu, fórum í sund, röltum um bæinn og heimsóttum Te og Kaffi nokkrum sinnum enda gott kaffi! Bautinn var heimsóttur líka að sjálfsögðu og fékk ótrúlega góðan Steinbít þar mmmm....slurp! Ekki má gleyma snillingnum Blöndal sem dró kaffivél uppúr kaffipokanum okkar handa mér og Arnari þegar við hituðum okkur kaffi á prímusnum. De Longhi kaffivél á heimilið, sjibbí!

Föstudagskvöldið var tileinkað meisturunum í Sigurrós. Undir grýttum fjöllunum í Öxnadal hlustuðum við á tónleikana þeirra sem voru algjör snilld. Sátum þarna í grasinu og þeir tóku hvert lagið á fætur öðru og spiluðu heillengi. Yndislegt. Get ekki sagt frá í orðum hvernig það er að hlusta á þessa drengi úti í náttúrunni.

Laugardagurinn var svo tekinn snemma enda skynsamt fólk á ferð. Kíktum aðeins inn á Akureyri, endurheimta sundskýluna hans Einars úr anus og svo einn caffe latte á Te og Kaffi. Svo var brunað á stað. Arnar stóð sig eins og hetja meðan við vitleysingarnir hrutum eins og svín. Kíktum inn á Sænautarsel, sem er gamalt heiðarbýli, torfbær og læti, yndislegt lummukaffi þar með kaffi og kakó og svona hressti okkur við og áfram var haldið á Egilstaði. Þegar þangað var komið var verslað grillmeti í bónus og svo kíkt á Tomma borgarann en þar fékk ég mér hreindýraborgara sem bragðast eins og Ísland eins og Einar komst að orði. Svo var keyrt inn að Borgarfirði Eystra sem er sennilega með fallegri bíltúrum ævi minnar. Svo var bara hent upp tjaldi, kaffi á Álfacafé og svo frábærir tónleikar. Emilíana var æðisleg, hún er svo mikil snillingur. Spiluðu tvö ný lög sem er ekki búið að taka upp og þau voru alveg frábært. Meiriháttar alveg. Svo komu Belle and sebastian og stemmningin var geggjuð. Brjálað stuð alveg hreint. Enduðu með tveim gömlum góðum og lýðurinn trylltist sem aldrei fyrr. Svo var haldið heim í háttinn með smá grillpásu fyrst en hátturinn var ekki mikill sökum láta og við gáfumst upp kl 06 og fórum bara heim.

Geggjuð helgi, skemmtilegur félagsskapur og brjálaðir tónleikar. Takk fyrir mig!

Alveg að tapa mér!!!

2006-07-26T09:04:00.000Z

Hálsinn enn klemmdur, ekkert smá pirrandi. Langar helst til að rífa hausinn af mér. Er að auki komin með verulegar áhyggjur af fyrirhugaðri útilegu, hvort það eigi að reyna að hafa hana af mér vegna meiðsla. ÆTLA að ná þessu úr mér í dag, ótal heitar sturtur, tonn af alls konar pillum, hitapokar og bakstrar og allt annað sem mér kemur til hugar!

Æj ég er föst...

2006-07-25T13:37:00.000Z

Vaknaði í gær og gat ekki hreyft höfuðið á mér og hef ekki enn getað náð þeim hæfileika aftur. Greinilega einhver hálsrígur sem hefur náð tangarhaldi á líkama mínum og neitar að skila honum aftur þrátt fyrir að ég hafi fætt hann með íbúfeni og deep heat kremum og núna er é komin með eitthvað dóp sem vinnufélai Arnars útvegaði honum, einhverjar alvöru verkjatöflur til að fæða hálsrígsskrímslið með, svona þar sem að læknirinn sem ég hringdi í í morgun vildi ekki gefa mér neitt, sagði mér að éta bara meira íbúfen en ég var búin að gera. Eins gott að þetta lagist því ég er að fara í snilldar útilegu á fimmtudaginn og get ekki beðið.

Held að hálsrígurinn sé refsing fyrir djammið á laugardagskvöldið. Ansi skuggalegt djamm. Við biðum svo lengi eftir fólki að þegar við fórum loks að borða voru allir orðnir ansi vel sokknir í glösin sín, undirrituð þeirra á meðal að sjálfsögðu. Endaði í afmæli hjá Jakobi hans Inga og þaðan aðeins í bæinn en sunnudagurinn var ekki hress enda hver er hress eftir þriggja tima svefn eftir djamm og drykkju? Ekki ég!!

Sigurrós á föstudaginn, Emilíana Torrini og Belle and Sebastian á laugardaginn og íslensk náttúra. Nammi namm.

Lokað vegna veðurs!

2006-07-20T10:31:00.000Z

Þegar kettirnir fara í frí fara mýsnar á stjá...hljóðar það ekki einhvern veginn svoleiðis?

Í gær flugu yfirmenn JPV á brott í frí á erlendri grund og ég tók það því upp á mig að loka fyrirtækinu og gefa þessum örfáu hræðum sem hér sitja frí. JPV hefur alltaf gefið einn sólarfrídag á sumri og ég ákvað að dagurinn til þess væri í gær enda þorði ég ekki að bíða með það ef svona dagur sæist ekki aftur í sumar. Yndislegt alveg.

Fór héðan og niður á Austurvöll, settist á Thorvaldsen með skemmtilegu fólki og sólaði mig. Árangurinn lætur ekki á sér standa, í dag er ég eldrauð. Algjör snilld.
Svo fór ég og keypti mér tvenna skó í GS skóm á útsölu fyrir inneign sem mamma mín var svo góð að gefa mér. Sjibbí. Svo á Vegamót í smá meiri sól, aftur á Austurvöll og svo loks í grill hjá tengdó. Í millitíðinni þurfti ég reyndar að hringja aðeins í lögguna því lásinn á hjólinu hans Arnars festi sig og vildi ekki losna og þeir eiga svona græjur til að klippa í sundur lása. Nema hvað að rétt áður en löggan kom náði Arnar að losa helv lásinn!!!

Vildi óska þess að ég væri úti í sólinni núna en maður getur nú ekki lokað tvo daga vegna veðurs er það?

Allavegana sund í hádeginu til að sjá sólina og brenna meira, kannski bara á bakinu í þetta skiptið! Gera förin sem ég er nú þegar með meira spennandi sko! Alveg nauðsynlegt!

Mér finnst rigningin góð, nananana úúú

2006-07-15T15:12:00.000Z

Pollýanna er mætt á svæðið. Afhverju? Jú vegna þess að annars verð ég brjáluð og fer með gullkortið til Heimsferða og segi við þá: laust sæti hvert sem er, alveg sama, bara ef það er ekki rigning. Þyrfti að sinna smávægilegum atriðum fyrst eins og að segja upp starfi mínu og þess háttar, ekkert nojað samt!

Pollýanna fór út í rigningunni í dag og einsetti sér að gera sér glaðan dag. Laugarvegurinn varð fyrir valinu og litið inn í Kron. Festi þar kaup á dásamlegum skóm sem Carrie Bradshaw hefði öfundað mig af og sitja þeir nú á borðinu og bíða næstu helgar en þá verður farið í grill og fjör (kannski í rigningu) í gettóinu með frönskunni. Pollýanna elskar miðbæinn og skellti sér því í Tiger og festi þar kaup á stórgóðri mynd og púzzluspili ásamt sudoko bók til að gleðja sig enn fremur í rigningunni. Kom svo við á leiðinni upp laugarveginn í Vínberinu og keypti mér ávexti. Aðeins inn í Bónus, Jói Fel var líka heimsóttur og snöggt stopp í BT urðu þess valdandi að ég kom heim mörgum þúsurum fátækari en með bros út að eyrum og skemmtiefni sem dugar mér út helgina því ég er búin að lýsa yfir national rain holiday og ætla að vera heima alla helgina með allt dóteríð mitt og borða mat héðan alla helgina. Mmmm notalegt.

Svo gott fólk, kveikið á kerti, fáið ykkur heitt og gott te, leggist upp í sófa og látið eins og það sé vetur, horfið á eina góða bíómynd og njótið lífsins. Það er allavegana það sem Pollýanna ætlar sér að gera!

Mörgæsirnar

2006-07-12T10:59:00.000Z

Hvern hefði grunað að Mörgæsir væru svona sætar. Horfði á myndina hans Lucs í gær á meðan Arnar hraut við hliðina á mér. Greinilegt að hann heillaðist ekki jafn mikið af þessum heimi þeirra.

Þvílík þrautseigja í þessum dýrum og vá hvað ungarnir eru sætir, mig langaði alveg að fá einn sem gæludýr á Klepparann, veit ekki alveg samt hvernig það færi þegar hann stækkaði.

Það er alltaf rigning og hvað svo?

2006-07-11T12:30:00.000Z

Alltaf rigning finnst mér. Spurning um að finna sér hluti að gera sem henta vel í rigningu!

- Las Flugdrekahlauparann um helgina. Grét í bílnum meðan Arnar brunaði yfir þessari bók. Hló líka.
- Byrjaði á Fólkið í kjallaranum. Veit ekki hvað mér finnst um hana ennþá, er ekki komin langt en finnst stíllinn góður. Kann að meta knappan stíl. Það er samt ekkert að gerast í henni en finn mig samt inni í hugsunum Klöru enda erum við báðar meðvirkir einstaklingar. Stuð í því.
- gott gin í magic eða engiferöl í góðu afmælispartýi þar sem kærastinn talaði "nörd" allan tímann. Áhugavert tungumál sem er þó torskilið og engin orðabók til.
- bærinn sökkar, en mikið sem það er gaman að minna sjálfan sig á það. Endaði á Pizza king með öllum hinum gelgjunum kl 05 00 og beið þar eftir pizzunni. Hösslaði leigubíl heim með kæró og pizzuna og samfylgdarkonu sem fékk að halda leigubílnum okkar eftir að við fórum úr honum.
- þynnka á sunnudegi í blíðskaparveðri sem varð þess valdandi að ég fór ekki út úr húsi allan daginn, nema þegar mig langaði í sjeik og til að kaupa á grillið.
- ZAZOU, mikið sem ég vildi vera fluga á vegg.

Aukinheldur hef ég horft á tvær kvikmyndir sem voru báðar álíka slappar. Horfði fyrst á "Failure to launch" með Sarah Jessica Parker sem ég elska út af lífinu og er einmitt búin að vera föst í Sex and the City í júní. Nema að myndin var algjörlega flöt, ekkert í gangi og þau ná engu chemistry saman á skjá hún og þessi gutti. Fór svo og horfði á Break UP og auðvitað grenjaði ég í bíó, hvað annað. Smart. Samt frekar slöpp mynd. Fannst samt góð setningin " I want you to want to do the dishes". Ég minnist þess að á góðum stundum hafi álíka setningum verið fleygt fram af minni hálfu og framan í minn heittelskaðann. Konur eru flókin fyrirbæri með undarlegar þarfir en það má hafa gaman að okkur.

Og þeir unnu ekki!!!

2006-07-10T09:54:00.000Z

Iss piss, Les Bleus unnu ekki þrátt fyrir dyggan stuðning frönskudeildar HÍ. Mikið sem mér fannst ég smart í gær að hlaupa að kaupa í grillmatinn og blaðra á meðan um það að við yrðum að drífa okkur, við myndum missa af fyrstu mínútum leiksins o.s.fr. Fannst ég ótrúlega mikil fótboltabulla og var bara að fíla það hlutverk mitt nokkuð vel. Kom heim í tæka tíð til að sjá Zidaninn skora úr vítaspyrnunni og svo var öskrað yfir leiknum. Fannst ótrúlegt að Frakkarnir skyldu ekki taka þetta og þetta eyðilagði áform mín um að horfa bara á fótbolta þegar að öruggt sé að liðið sem ég haldi með vinni leikinn en státa þó af því að hafa náð tveimur af þrem!

Ætlaði að horfa á þetta á Gauknum en sökum hörkunnar nóttina áður, þá meikaði ég ekki annað kvöld inni á reykmettuðum skemmtistað. Horfði því á hann heima í opinni dagskrá en frétti svo af frönskudeildinni sem sat á gauknum, með franska fánann málaðan framan í sig og svona. Við erum svo öflug. Mjög smart finnst mér

Allez les bleus!

2006-07-06T13:26:00.000Z

Já, það hefði engann grunað það en ég settist á Gaukinn með skemmtilega fólkinu mínu og horfði á frábærann fótboltaleik þar sem mínir menn unnu að sjálfsögðu enda neita ég að horfa á fótbolta nema að mitt lið vinni. Frakkar skoruðu sumsé í vítaspyrnu og höfðu betur þrátt fyrir leiktilburði Ronaldo í Portúgalska liðinu sem lét sig detta í sífellu í von um að fá eitthvað út úr dómurunum. Fannst það fremur léleg íþróttamennska.

En sumsé nú eigum við stefnumót á sunnudaginn líka, skemmtilega fólkið til að horfa á úrslitaleikinn og eins gott að mínir menn vinni því ég get ekki horft á leik þar sem þeir tapa en sjáum hvað setur.

Annars er sumarið þétt setið skemmtilegum viðburðum þrátt fyrir að veðrið láti stundum sitja á sér. Risa grillveisla, tónleikaferð austur, 14.júlí partý og vonandi eitthvað sumarbústaða partý um versló er á dagskránni. Gaman að þessu!

Þjáist annars af algjörri útlandaþrá og dagdraumarnir ná oft á dag tökum á mér þar sem ég hugsa um ferðir til Köben í hitabylgju eða bara hvert sem er nema hér. Skrítið þegar svona grípur mann.

Jæja, það er allavegana sól í dag, njótið meðan þið getið.

Áfram víkingar

2006-06-29T11:02:00.000Z

Já, við ætlum samt í útilegu og stefnum á að taka þetta veður í nefið, ekki spurning. Verð í Fossatúni um helgina hjá Steinari Berg, allir velkomnir sem vilja koma.

Úti um útileguna?

2006-06-28T10:30:00.000Z

Þó það sé sól úti í augnablikinu hef ég lagst í þunglyndiskrampa yfir íslensku veðurfari. Ástæðuna má sjá hér eða hér eða hér

Eins og gefur að skilja er verið að taka til íhugunar fyrirhugaða útilegu frönskudeildarinnar, við erum alltaf til í ævintýri en hvenær verður það of mikið af því góða? Það er spurningin!

Mér finnst rigningin góð...

2006-06-27T13:18:00.000Z

Ójá, það má ýmislegt gera í rigningu. Mér hafði hinsvegar aldrei komið til hugar að skokka, gera armbeygjur, froska, hnébeygjur, hopp, skopp og svo magaæfingar í rigningu á blautu malbiki.

Ég var ekkert smá stolt þegar að æfingunni lauk og ég hafði gert það sem mér var sagt að gera, stundum náði ég ekki að gera það jafn oft og aðrir en ég kláraði málið þó ég væri svoleiðis rennandi blaut í gegn og hægt að vinda öll fötin mín. En vá hvað ég var líka búin þegar við komum heim. Úff

Svo var yours truly bara í blaðaviðtali áðan, spjalla við ferðablað moggans um ferðina til Túnis og svona. Já, maður er frægur!

Ótrúlegur dugnaður

2006-06-21T13:24:00.000Z

Í gær byrjuðum við Arnar á 12 vikna námskeiði hjá BOOTCAMP og það var ekkert smá erfitt en mjög gaman. Hef á tilfinningunni að maður eigi eftir að svitna eitthvað í sumar.

Líkaminn er svolítið aumur núna, harðsperrur og huggulegheit þannig að í hádeginu skellti ég mér í sólinni í sund á Seltjarnarnesi, sú laug er algjör snilld, vá hvað hún er flott. Sturturnar svo góðar, næstum því of góðar eins og Frikki sagði um helgina. Mæli með henni. Finnst ég svo healthy núna með harðsperrur allsstaðar, meira að segja í maganum... ;)

#$%#&//%&

2006-06-20T16:09:00.000Z

Hafið þið reynt að tala við %$#&""#$% skattinn??? Ég hallast að því að þetta séu eintómir pappakassar. Mér er algjörlega óskiljanlegt hvernig það er hægt að senda mann síma á milli vegna þess að enginn veit neitt og þeir vita ekki einu sinni hver veit hvort einhver viti. Og svo er þessu PAPPAKÖSSUM borgað laun eins og það sé fullkomlega eðlilegt.

Mér er hreinlega spurn hvað þetta fólk gerir allan helv liðlangann daginn?

(Varð bara að blása smá út, þetta er örugglega vænsta fólk)

Loksins!

2006-06-19T17:17:00.000Z

Loksins kom að því!

Til hamingju með bleika daginn :)

2006-06-19T15:15:00.000Z

Sveitasælan

2006-06-19T09:42:00.000Z

Eftir yndislegt föstudagskvöld í góðra vina hópi ákváðum við að skella okkur út í sveit með Frikka, Sóley og Tímon. Hittum þau á Skógum, fengum okkur smá göngutúr og svo grillaði Frikki handa okkur. Svo var keyrt í Sólheimahjáleigu en þar gistum við í bændagistingu (Jóna Sólveig frönskupía er uppalin þar). Svo fórum við í splunkunýju sundlaugina í Vík, keyrðum upp á Reynisdranga og loks grilluðum við kvöldmat á bænum. Yndislegur dagur og geggjað veður.

En það besta beið enn því í gær keyrðum við svo inn í Þakgil og eyddum deginum þar í sól og yndi. Við komum töluvert áður en brúðkaupið hófst, grilluðum okkur og keyrðum þarna um, löbbuðum og hentum okkur svo í sturtu hjá þeim. Svo hófst brúðkaupsgleðin, yndislegt brúðkaup, ofurrómantískt, hellirinn skreyttur með kertum og brúðhjónin stórglæsileg. Það var allt svo afslappað og notalegt... alveg yndislegt bara!

Segi bara TIL HAMINGJU ELSKU BRÚÐHJÓN!!

Enduruppgötvun

2006-06-17T01:12:00.000Z

Í vetur hafði ég aldrei tíma til að gera neitt. T.d. hafði ég aldrei tíma fyrir vini mína. Það er yndislegt að þó það rigni, þá er samt sumar og ég get gefið mér tíma fyrir vini mína.

Bauð skemmtilegu fólki í kvöldmat, gaf því lasagne og súkkulaði fondue í desert og svo tókum við félagarnir í spil eins og Sóley orðaði það svo skemmtilega fyrir löngu síðan. Arnari var algjörlega rústað í Partý og co og hann heldur að spilinu hafi verið riggað... en hann er bara svona lélegur... ;)

Á morgun verður svo haldið úr bænum í góðra vina hópi. Jóna Sólveig sæta ætlar að hýsa okkur í eina nótt og við ætlum að skella okkur í brúðkaup í helli...trúi því varla en það er loks komið að því, þau eru að fara að gifta sig elsku Drífa og Árni, það yndislega fólk! Hlakka til að sjá þau ganga í hnapphelduna, finnst ég alltaf eiga soldið í því sambandi...!

Hvað er málið?

2006-06-14T09:10:00.000Z

Lét mér detta í hug að fara í smá útilegu um næstu helgi, svona í tilefni þess að ég er að fara í bryllup á Vík á sunnudaginn. En að sjálfsögðu, sjálfsögðu er veðurspáin þannig að það verður vafalítið ekki líft í tjaldi. Þar með er úti um útileguna.

Það liggur köttur hérna á borðinu hjá mér, ansi heimilislegt en hann hefur það svo svakalega notalegt að mig langar bara að hringa mig utan um hann og leggja mig með honum....hvernig ætli það sé séð á vinnustað?

Blekkingarleikur

2006-06-13T15:09:00.000Z

Þrátt fyrir sólina hérna úti er samt skítakuldi. Skalf á beinunum alla leiðina í vinnuna á reiðfáknum mínum!

Hvað eigum við að gera í sumar? Viljið þið koma í útilegu?

Vorhreingerningin

2006-06-13T15:07:00.000Z

Ákvað að taka aðeins til í linka listanum mínum hérna til hægri, snyrta þetta aðeins og taka út blogg sem eru óvirk og setja inn önnur sem eru virk og svo bætti ég líka inn litlu englunum sem ég þekki.

Ef mig vantar einhverja skemmtilega linka megið þið láta vita.

Nokkrar myndir

2006-06-12T20:23:00.000Z

Eins og áður kom fram var haldið myndakvöld Túnisfara og langaði bara til að sýna þeim sem hingað reka inn nefið örfáar myndir þaðan, bara svona til að sýna ykkur andrúmsloftið þar!!!

Fallega sumarveðrið

2006-06-12T16:08:00.000Z

Já, þegar það er svona ljótt og leiðinlegt veður úti, þá þrái ég ekkert heitar en að vera undir sæng í sófanum mínum að horfa á imbann og jafnvel með kertaljós svona til að gera enn meira rómó. Styttist í að klukkan verði 17.00 og að ég geti gert nákvæmlega þetta.

Hvað á ég eiginlega að hafa í kvöldmatinn, þoli ekki þetta...!

Þreyttari á mánudegi en föstudegi!

2006-06-12T09:40:00.000Z

Það kemur ekki oft fyrir að ég sé þreyttari á mánudegi en föstudegi en það kemur þó oftast fyrir á sumrin. Þessi helgi var tekin á stífu prógrammi en var jafnframt alveg ótrúlega skemmtileg.

Föstudagskvöldið var í faðmi Túnisfara, myndakvöld og svona smá reunion. Allir svo ánægðir og glaðir með ferðina og ekki skemmdi fyrir að ég fékk pakka frá förunum sem þakklætisvott fyrir skipulagninguna, alvöru Champagne og alles. Það var nú kannski drukkið helst til mikið, svona miðað við að dagskrá næsta dags átti að hefjast kl 10.30 og standa allan daginn.

Já mikið rétt, hún Drífa sæta er að fara að gifta sig um næstu helgi og við gæsuðum hana á laugardaginn. Ótrúlega sem mér finnst gaman að gera þá stúlku glaða, hún var eitt bros allan daginn og það var yndislegt. Við sendum hana í listflug, lunch, lúxus fótsnyrtingu, smá sprett í Kvennahlaupinu og áritun á bringuna hjá Snorra Idol, útileikjamót einhleypra og ógiftra kvenna í Öskjuhlíðinni, singstar partý og svo út að borða á Ítalíu. Héldum henni vel hífaðri allan daginn en aldrei þannig að henni liði illa. Ég skildi við hana svo í innfluttningspartý hjá Frikka og Sóley með eplasnafsflösku og stórt bros á vör og fór heim í háttinn, enda búinn að berjast við þynnkudjöfulinn allan daginn og á leiðinni að verða guðmóðir daginn eftir :)

Litla prinsessan var svo sumsé skírð í gær. Ég er guðmóðir hennar og ofsalega stolt af því hlutverki. Svo segir presturinn "hvað á barnið að heita" og eftir að foreldrarnir sættust á það hvort þeirra ætti að segja nafnið kom í ljós að litla daman heitir GUÐRÚN KLARA EGILSDÓTTIR og mamma stóð við hliðina á mér og bara táraðist alveg rosalega yfir því að vera búin að eignast nöfnu og ég klökknaði eiginlega líka en reyndi nú samt að halda andlitinu. Finnst þetta ofboðslega fallegt og yndislegt og passar vel saman Guðrún Klara en Klara er tekið úr fjölskyldu Þórhildar. Kristján Dagur verður samt örugglega svolítinn tíma að melta nafnið. Pabbi hans spurði hann hvað presturinn hefði sagt að systir hans héti og þá sagði hann "Solla Stirða". En restina af deginum skiptist hann á milli þess að segja að hún héti SIF og svo kúkalabbi. Ég kýs að setja það ekki í neitt samhengi. Hann er nú búinn að dreifa því víða að hún heiti Sif, það er tíðrætt á leikskólanum MÚHAHAHA. En sumsé, hún á nafn og svona líka fallegt nafn.

Góð helgi en vá hvað ég var lúin í gær, West Wing sunnudagur og notalegheit.

Í dag...

2006-06-09T16:14:00.000Z

... er ég þakklát fyrir að Arnar er ekki fótboltafrík :)

Komin heim ´úr eyðimörkinni

2006-06-06T15:50:00.000Z

Er ekki kominn tími á smá öppdeit?

Við erum sumsé komin aftur heim (fyrir viku síðan) og höfum legið í flensku og hóstaköstum síðan. (Arnar pakkaði bronkítis ofan í töskuna á leiðinni heim alveg óumbeðinn).

París var yndisleg, við fórum til Versala sem mér fannst mögnuð upplifun, svo heimsóttum við Louvre, röltum borgina þvera og endilanga, pikknikk í Lúxemborgargarði, mýrin, bjórinn o.s.fr. Við gistum í góðu yfirlæti hjá henni Gaelle vinkonu okkar þar til hópurinn kom en þá færðum við okkur yfir á hótel.

Túnis var yndisleg, hitabylgjan skall á um leið og Gallíu félagar lentu og við eyddum því viku í 40 stiga hita og oft meira (mælt í skugga skal tekið fram). Margt sem kom á óvart, t.d. hversu vestrænt þetta er alltsaman en samt með svona arabískum blæ.

Fyndnasta mómentið var án efa í miðri Sahara eyðimörkinni á úlfaldabaki og Guðni sat fyrir framan mig og blaðraði í farsímann sinn til Íslands. Já, í Túnis er alls staðar símasamband.

Við fórum sumsé eyðimerkurferð, í siglingu, gönguferð dauðans, hjólaferði dauðans, kynntumst guide dauðans, gistum á hóteli dauðans, með mati dauðans og fleira í þeim dúr. En þetta var mikil ævintýraferð og hópurinn er frábær og svo skemmtilegur að ég vil endilega halda áfram að ferðast með þeim.

H&M var tekin í bakaríið ósofin eftir flugið frá Túnis til P. Fyrst fór ég meðan strákarnir drukku í sig kraft og svo fór ég með þá eftir tvær rauðvínsflöskur og hjálpaði þeim að versla á sig. Öflug kona sjáiði til!

Heimkoman var góð, svona í 12 tíma, sérstaklega gott að sofa í rúminu sínu og borða íslenska pizzu og svona en svo tóku veikindin bara við og hafa hrjáð okkur síðan en það stendur allt til bóta og helgin er spennandi. Skemmtilegt planað fyrir hvern dag helgarinnar. Hlakka mikið ti á föstudaginn en þá er myndakvöld Túnisfara og það verður gaman að hitta alla aftur!

Nú er bara vinna í sumar, ef þið vitið um einhverja smá aukavinnu sem ég gæti unnið í sumar, helgar og á kvöldin, bara svona til að grípa í sem ég gæti fengið greidda án þess að ríkisvaldið komist að því, þá væri það vel þegið, því nú upphefst söfnunin fyrir Barcelona og ekki veitir af, leigan er svo dýr!

Svo er ykkur öllum boðið í mat til mín, hringið bara og fáið tímasetningu!

Að sofa eða sofa ekki....?!?

2006-05-13T03:35:00.000Z

Spurningin er þegar að klukkan er 03.28 og vekjaraklukkan stillt á 04.30 hvort það taki því að sofna. Verður maður þá ekki bara drowsy og illa sofinn og er þá ekki skárra að vera ósofinn?

Mun komast að því í dag!

Að vetri loknum...

2006-05-05T14:32:00.000Z

Nú sér loks fyrir endann á þessum vetri. Verð að segja að hann hafi sennilega verið sá erfiðasti og mest stressandi í mínu lífi. Vildi að ég gæti kennt einhverjum um það öðrum en sjálfri mér en svo er ekki. Af einhverjum ástæðum ákvað ég að taka að mér alltof margt. Ekki bara að vera í fullu námi og skila af mér 81 tíma í vinnu á mánuði heldur sjá líka um nemendafélagið, hópferð til Túnis, kennslu, sjálfsrækt o.s.fr.

Þetta er því officially veturinn sem ég gerði allt! Mér finnst ekki leiðinlegt að þessi vetur er búinn. Ég mun ekki sakna þessa veturs né gráta hann í nostalgíukasti heldur þakka guði fyrir að hann komi aldrei aftur!

Á tímapunkti í vetur fannst mér eins og ég myndi líkamlega brotna í tvennt. Held að það hafi verið í mars.

Í tilefni af því að þessi vetur er búinn og af því að ég er svo glöð að hann sé búinn vill ég nota tækifærið og þakka öllum þeim sem þurftu að þola mig í vetur, you know who you are!

Í sumar verður svo sannarlega lítið annað gert en að njóta lífsins. Að vera í 100% starfi hljómar ofboðslega vel. Frí um helgar, aldrei samviskubit utan vinnutíma yfir því að gera eitthvað skemmtilegt, hvítvínsglas hér og þar, útivist og útilegur og jafnframt TÚNIS!

8 dagar í sæluna.

Ætla að massa upp þessi ****** málfræðiprófi, ráðast í eitt þýðingarverkefni og henda mér svo í rómance í París og tjútt í Túnis.
Ég ætla líka að setja tærnar í fótsnyrtingu og finna mér sómasamleg sundföt. Jafnvel setja sumarblæ yfir hárið líka, allt áður en ég fer til Túnis svo maður verði nú ferskur og flottur á ströndinni :)

Ætla að láta þetta blogg duga fram yfir Túnis!

Hér er litla prinsessan :)

2006-05-05T07:45:00.000Z

Dóttir hans Egils, nýjasti fjölskyldumeðlimurinn og afmælisgjöfin hans pabba.

Yes, Jóhanna Sif er fædd!

2006-05-03T13:05:00.000Z

Kl 10.29 kom Jóhanna Sif Egilsdóttir* í heiminn, 14 merkur og heilsast vel eftir því sem ég fæ best skilið! Pabbi minn sem á afmæli í dag fær því litla afaprinsessu í afmælisgjöf og óhætt að segja að við erum öll í skýjunum!

Spá okkar um að þetta væri stelpa hefur því reynst rétt og ég hlakka mikið til að fara og fjárfesta í öllu bleiku, dúkkum og barbie!

Og Kristján Dagur yndislegi er orðinn stóri bróðir og hefur vaxið og dafnað mjög eftir að hann frétti af þeirri ábyrgð sem þessu fylgir. Veit að hann á eftir að passa systur sína vel og eins gott að koma vel fram við dömuna, annars er Spiderman** að mæta.

*Hún hefur ekki verið nefnd, þetta er bara óskhyggja mín.
**Hann KD er nebblega Spiderman, pabbi hans er Súperman og afi er stundum batman og stundum gímsli, fer allt aftir þvi hver spyr!

100 ára hús

2006-05-03T08:32:00.000Z

Fór í leikhús í gær. Jón Atli bauð okkur að koma og sjá nýja verkið sitt, 100 ára hús, í Nauthólsvíkinni. Já, Nauthólsvíkinni. Leikritið er sett upp í gömlu bresku hermannatjaldi sem keypt var af netinu og flutt til landsins. Því er tjaldað á ströndinni og maður situr í garðstólum undir teppi með heitt kakó. Það er fyrsti hlutinn af þessari yndislegu upplifun!
Leikararnir voru alveg hreint stórkostlegir. Björn Thors fer á kostum við að leika þroskaheftan mann. Hann gerði það svo ofboðslega vel að það var sárt að horfa á hann. Hef ekki séð Björn áður í hlutverki sem hann nýtur sín svona vel í enda svo sem ekki séð mörg verk. Uppáhaldsleikarinn minn hann Ólafur Egill var stórkostlegur að vanda. Mér finnst hann alveg frábær. Laufey lék hjúkkuna og fyndið nokk, sá marga takta frá Herborgu og gat ekki annað en velt því fyrir mér hvort bróðir hennar hafi nýtt sér hana að einhverju leyti sem fyrirmynd.

Húmorinn hans J.A. skein svo skýrt í gegn og ég skellti margoft uppúr. 3 gamalmenni samankomin á elliheimili í einu og sama herberginu og þegar 3 elliærir einstaklingar koma saman getur margt spennandi gerst og lífið oft verið skondið eða sorglegt, eftir því hvernig maður lítur á það.

Ég sá Brim og algjörlega elskaði það og þetta sló því ekkert eftir! Merkilegt hvað þessi drengur er próduktívur!

En já, yndisleg leikhúsferð í gær...var svo þreytt að ég ætlaði ekkki að fara út úr húsi en dreif mig bara og sá ekki eftir því.

Svo í dag fæðist frænka eða frændi og ég er nú ansi spennt enda ekki á hverjum degi sem það gerist. Ég held að það sé frænka en fljótlega uppúr hádegi kemur í ljós hvort ég hafi haft rétt fyrir mér.

Svo hjólaði ég í Hlöðuna í dag og kom hingað másandi og pásandi enda rok úti. Samt í besta lagi, það var ótrúlega gaman....var með kelly Clarkson í botni og skemmti mér konunglega.

Jæja, málfræðin bíður!

Í formi

2006-05-02T14:53:00.000Z

Fór út að hjóla í gær. Hjólaði niður í bæ og svo meðfram sjónum heim aftur. Undanfarin tvö ár hef ég tekið hjólið mitt fram og hjólað í vinnuna og heim aftur. Það var svo erfitt að ég tók hjólið ekki aftur fram það sumar. Núna er ég búin að vera í ræktinni frá því í janúar og það var leikur einn að hjóla þennan hring. Gaman að sjá svona skýrt dæmi um það hvernig heilsunni fer fram hjá manni! Ánægð með sjálfa mig og þjálfarann!

Svo grilluðum við fisk í matinn sem var hryllilega góðður, bleikja....setti ólífuolíu á hann, kryddaði með salti, pipar og herbes de provence og setti svo sítrónu og lime sneiðar yfir og á grillið í álpappír....algjört nammi!

Og á morgun fæðist nýr einstaklingur í fjölskylduna! Gaman að vita það með svona fyrirvara, verður gaman að kynnast nýjum einstakling og verða tvöföld föðursystir og frænka!

Ó svo sumarlegt

2006-05-01T19:51:00.001Z

Fórum í hjólatúr, hjóluðum niður í miðbæ og svo meðfram sjónum heim aftur. Stoppuðum á kletti og horfðum á Esjuna.

Yndislegt!

Nú er Klausturbleikja á grillinu og salat á borðinu!

Ó svo sumarlegt

2006-05-01T19:51:00.000Z

Sumarið á næsta leiti?!

2006-05-01T14:29:00.000Z

Mmmm yndislegt úti! Ætla að skella mér í smá hjólatúr á eftir í tilefni af því.

Fór og sumraði mig upp með allskyns fínum sumarfatnið sem mun væntanlega sóma sér vel í Túnis. Ferða fiðringur í mér allri og algjör skólaleti. Er búin að fresta lærdómi aftur og aftur en er þó komin með næstum 4 bls af 8 bls af þýðingum og svo eru 4 bls af svona commentaire eftir til að setja aftan við þýðinguna og mér líst bara nokkuð vel á þetta held ég. Vona að þetta verði sómasamlegt!

Fór á tónleika um daginn með Eivöru, Ragnheiði Gröndal og Sinfóníunni og það var yndislegt, þrumu söngkona hún Eivör!

En núna er það speltbrauð og svo meiri lærdómur!

Ég er letihlussa?

2006-04-22T21:39:00.000Z

Það sem er óþolandi við að vera í skóla er að maður er með nístandi samviskubit allar þær stundir sem ekki er eytt í það allra nauðsynlegasta, sbr. svefn, næringu og lærdóm eða vinnu.

Á morgun segir sá lati....ég segi ekki á morgun heldur hinn....what does that make me?

Meðvirknin að drepa mig?!?

2006-04-22T21:24:00.000Z

Fokk, ég er svo meðvirk!

Ætlaði að skrifa einhvern pistil um einhverjar pælingar sem vöknuðu á surfi um netheima en fattaði að ég er bara of meðvirk til að skrifa hann. Ein setning dettur inn í hausinn á mér en svo fer ég í að greina hana, verður hún misskilin, mun fólk halda að ég sé X, mun þessi verða sár og halda að ég hafi meint X og þannig hélt þetta áfram þangað til að ég eyddi þessum mother ******* pistli.

Það er stundum svo skratti erfitt að vera svona FULLKOMIN!!!!!

Afhverju sakna ég Frakklands svona mikið?

2006-04-21T16:06:00.000Z

Einu sinni var...!

2006-04-19T16:23:00.000Z

Sú var tíðin að ég var algjör lestrarhestur. Ég vann meira að segja verðlaun fyrir það hvað ég las mikið í Melaskóla. Eftir að ég byrjaði í Menntaskóla, þá hætti ég að lesa eins mikið og ég gerði og í dag les ég sama og ekki neitt. Ég gæti borið við tímaskorti, en samt finn ég mér tíma til að horfa á alla heimsins sjónvarpsþætti og nú er ég komin með algjöra minnimáttarkennd yfir því hvað ég les lítið. Samt tekst mér aldrei að koma mér almennilega á skrið aftur.

Nú skal verða breyting þar á og eftir helgina ætla ég að vera búin að lesa bókina sem ég ætla mér að þýða hluta úr.

Í dag er síðasti dagur vetrar....

2006-04-19T14:33:00.000Z

Og veður konungur ætlar sér heldur betur að nýta hann því þegar ég horfi út um gluggann, þá er bara haglél!

Eins gott að þetta sé síðasta skotið því nú er kominn tími á smá sumar, ég nenni ekki meiru!!!

Fishounette

2006-04-18T18:35:00.000Z

Fékk þessa mynd senda í gegnum MSNið áðan.... :)

Einn af mínum mörgu homma vinum. Ekki að ástæðulausu sem maður er stundum kallaður hommahækja!

Hvað ætli það sé sem geri hommahækju svona góða hommahækju? Hef oft velt þessu fyrir mér!

Afdrifarík helgi

2006-04-17T19:50:00.000Z

Páskunum varið í faðmi fjölskyldunnar. Yngsti meðlimurinn að verða 3ja eins og kom oft fram og hann fór heim með farteskið fullt af nýjum orðum. Á meðal þeirra voru: kúkalabbi, pissudúkka og klikkhaus! Niðurstaðan er þessi: ég er pissudúkka, amma er kúkalabbi og afi er klikkhaus. Snáðinn er spidermann, pabbi hans er súperman og svo er mismunandi hver fær úthlutað batman og ef maður er í ónáð þá er maður ekkert nema grímsli!

Heimurinn er svo einfaldur!

Ég á líka páskaegg naninanibúbú!

2006-04-13T09:50:00.000Z

Haldiði ekki að JPV hafi unnið í leik páskaegg á línuna, og ekkert minnstu eggin heldur egg nr 7 frá Nóa sem er núna í skottinu og á leið í sveitina. Ekki að ég hafi gott af þessu enda í hardcore æfingarprógrammi núna en ætla með það í sveitina og bjóða einhverju góðu fólki uppá það með mér! Deila í stað þess að éta það allt ein! Þannig minnkar kaloríuinntakan!

Ég er að fá eitthvað menntaskólaskvís hérna heim í einkatíma í frönsku. Ætli við byrjum ekki á reglulegum sögnum sem enda á -er. Finnst það líklegast.

Ætla að kíkja á efnið og svona áður en hún kemur en langaði bara að segja Gleðilega páska!

Nennir maður þessu?

2006-04-11T17:38:00.000Z

Held að mér finnist leiðinlegt að blogga, ætla aðeins að hugleiða þetta.

Ritgerðarefnið sem heldur mér í heljargreipum í dag er "Le bonheur est-il de ce monde" eða "Er hamingjan af þessum heimi" . Hélt þetta væri brandari þegar ég sá það en nei, alvara!

Árshátíðin flott, vel heppnuð, mikið stuð og mikið af fólki!

Ekkert annað frétta held ég! Skorradalur um páskana og almennt féleysi, afhverju vaxa peningar ekki á trjánnum? Afhverju kann ég ekki að fara með peninga?

The Uglies

2006-04-03T20:53:00.000Z

Varúð, langt blogg!

Ójá, vaknaði í morgun með slæmt tilfelli af ljótunni. Vaknaði meira að segja kl 05 vegna slæmra draumfara...piff. En já, sumsé, með slæmt tilfelli af ljótunni, þurrkublettir, bólur og ómeðfærilegt hár ásamt því að öll betri fötin hengu blaut á snúrunni stuðluðu að því að mig langaði frekar að grafa mig langt undir sængina og koma ekki þaðan fyrr en ljótan hefði yfirgefið svæðið en sökum óstjórnlegrar þarfa kennara minna til að halda próf í tíma og ótíma þurfti ég að dröslast fram úr og í skólann. Einum latte, tveim cappuchinoum og skóla síðar var ég komin heim ofurþreytt en er ekki búin að fá neina kríu og er að reyna að plata Arnar til að koma í fyrra fallinu að lúlla...gengur ekki vel...bersýnilega þar sem ég er að blogga í staðinn fyrir að kúra! Piff!!!!

Btw...Búðir eru geggjaðar. Ekki bara var ég í stjörnufans alla helgina með Silvíu Nótt, Andreu Róberts og Andra Snæ heldur var besti félagsskapurinn þessi yndislegi maður sem vill ekki koma að kúra. Tilefnið var 5 ára afmælið. Undirritaður var samningur um 5 ár í viðbót ( á hverju afmæli er samið um sömu lengd ára til viðbótar við þau sem verið er að fagna ). Rómantíkin leynist í hverju horni á Búðum, borðuðum geggjaðan mat, alveg hiklaust topp tíu á Íslandi og þóttumst fara í gönguferð í hörku frosti og roki sem fer ekki svo vel saman. Fórum á trúnó með Silvíu Nótt, skáluðum í rauðvíni o.s.fr. Mæli með þessu. Var hundfúl að þurfa að fara heim í gær eldsnemma til að drösslast í lærdóminn en HÍ lætur ekki hæðast að sér!

Og í dag er 3. apríl. það þýðir að æskuvinkona mín hún Herborg Drífa er 25 ára í dag. Til hennar sendi ég jákvæða strauma á þessum degi sem kannski verður ekki besti afmælisdagurinn hennar og því höfum við ákveðið að slá honum á frest um viku! Samt sem áður, þetta er 22. afmælið hennar sem við erum vinkonur, hef þekkt hana að eilífu og finnst ég stundum þekkja hana betur en ég þekki sjálfa mig. Fylgst með henni og hún með mér og við meira eins og systur en nokkuð annað sem útskýrir afhverju þetta er stundum erfiðara en auðveldara en þannig er það með fjölskylduna manns að hún er það dýrmætasta sem maður á og því yfirgefur maður hana ekki þegar í harðbakkann slær heldur leggur á hjallann með þeim sem manni þykir vænt um....! En sumsé, ég sendi baráttukveðjur til einstökustu manneskju sem ég þekki sem kljáist ekki einungis við ellidrauginn sem knýr að dyrum! Hver annar gæti staðið af sér þennan hvirfilbyl en Herbert?

Ójá, maður verður bara væminn með ellinni!

Og að lokum, afmæliskveðjur til barnanna minna, Breki og Rikki urðu 5 ára í gær eins og við Arnar. Því miður var fjölskyldunni stíað í sundur snemma á æviskeiðinu vegna læknisfræðilegra ástæðna og því hef ég ekki einu sinni náð að kyssa þá til hamó með ammó en veit að stjúpforeldrarnir standa sig í stykkinu og örvænti því ekki!

Og alveg að endalokum, Einar Theódór segir að við séum ógeðsleg, við vorum alltaf að kyssast meðan hann var hérna og að hans sögn sögðum við mikið "baby baby" og þar fram eftir götunum. Ójá, gelgjan getur víst skollið á við 6 ára markið! Vil samt benda á að ég minnist þessi ekki að hafa sagt baby baby nokkru sinni við Arnar á þessum 5 árum!

Og allra allra síðast, eins og sést er ég í svefngalsa og ætla uppí rúm!

Ég er hetja

2006-03-27T20:03:00.000Z

Ójá, ég er með íþróttameiðsl, múhahaha. Held að það sé örugglega í fyrsta skipti um ævina!

Fór af stairmasternum áðan í of miklum hraði eftir ofsa brennslu og rak fótstigið í löppina á mér, bólgin núna með stórt sár og vont að stíga í löppina. Myndi vera meira sorry yfir þessu ef þetta hefði ekki verið svona yndislega klaufalegt og asnalegt, ég var bara svo búin á því með svitann í augunum og svo bara slösuð! Ástand á bænum!!!

Einsi búinn að fá nóg af okkur, fór að háskæla áðan, vildi fá mömmu sína og hætta að vera lasinn. Kominn spenningur í hann því hann veit að þau eru að koma á morgun!

Jæja, ætla að fara og horfa á Tomma og Jenna.

In your dreams

2006-03-27T12:08:00.000Z

Fékk póst frá fasteignahluta mbl.is. Skráði mig þar fyrir löngu, í þeim eina tilgangi að láta mig dreyma. Í póstinum var verið að auglýsa íbúð sem uppfyllti öll mín skilyrði. Sýndi Arnari hana og hann var jafn hrifinn og ég. Og í draumaheimi hringdum við í fasteignasalann til að vita hvað eigandinn vildi fá fyrir hana. Raunveruleikinn hrifsaði okkur aftur til sín, litlar 55 millur. Mjá, þarf eitthvað að endurskoða skilyrðin mín sem draumaíbúðin á að uppfylla...can't afford it!

Ekki það að við séum neitt að flytja, bara láta okkur dreyma og svona pæla því jú það hlýtur að koma að því einn daginn að við flytjum! Er það ekki?

Æj nei

2006-03-26T21:08:00.000Z

Héldum að Einsa væri batnað en hann var bara að plata, er aftur kominn með hita þrátt fyrir að hafa verið hitalaus í gær og mestan part dagsins, svo það er heima aftur á morgun.

Kíktum á lagersölu Senu áðan og það er algjört drasl. Flestar myndir sem eitthvað var varið í voru á 1500 kall og margar hverjar voru í boði hjá BT á 999 eða 899 krónur held ég og í Bónus á svipaðan pening.Algjört svindl fannst okkur. Kíktum við í BT og keyptum Svamp Sveinsson og Tomma og Jenna, ekki beint handa okkur heldur stráknum litla sem hættir ekki að vera lasinn!

Sunnudagur í loftinu, hætti við leynifundinn þar sem við borðuðum svo seint en það sleppur alveg því ég fór á svoleiðis í gær!

Best að horfa á Tomma og Jenna og kúra með kútinn, hann kallar mig kúruskrímslið, verð að standa undir nafni!

Örmagna foreldar

2006-03-26T15:48:00.000Z

Hihihi, ég sofnaði milli 10 og 11 í gær, alveg búin á því. Merkilegt hvað drengurinn hefur mikla orku með þennan mikla hita, hann er samt með helmingi meiri orku en við. Brugðum okkur aðeins á Bræðró að borða sushi og Einsi fékk kjúlla. Svo var bara heim. Held að hann sé nú að verða búinn að fá nóg af því að hanga alltaf inni og í þessu dásemdar veðri líka og skil hann vel. Ég dreif mig í ræktina eftir að hafa legið hér í einhverju móki fram eftir morgni. Sjónvarp er yndisleg barnfóstra skal ég segja ykkur!

Er líka búin að njóta þess að vera ekki í einhverri geðveikri skólavinnu, nýt þess eiginlega of mikið og opna ekki bók, þarf nú samt að lesa eins og eina smásögu áður en degi lýkur. Spá í að fara á leynifund í kvöld, hef svo gott af því.

Veit einhver um vel staðsetta íbúð í Barcelona sem kostar helst ekki meira en 700 evrur á mánuði? Ef svo er, þá má láta mig vita. Er búin að komast að því að ég get komist í internship hjá útgáfu þarna úti ef ég vill og líst ekkert smá vel á það. Stendur líka til boða ein frábærlega staðsett íbúð rétt hjá römblunni og picasso safninu en líst ekki á verðið, 1000 evrur sem er allt námslánið mitt eins og það leggur sig meðan við erum þarna úti og það gengur ekki upp.

Jæja, læt gott heita, best að sturta sig eftir gymmið og gera eitthvað af viti!

Með barn í fóstri

2006-03-25T08:34:00.000Z

Fór og sótti Einsa á fimmtudaginn í skólann og þar lá hann greyið á dýnu, kominn með hita. Það var bara brunað með ræfilinn heim og kemur í ljós að hann var með 39 stiga hita. Meira hvað börn eru miklar hetjur því í gær neitaði hann að láta lasleikann og 39 stiga hitann hefta sig í að skemmta sér hjá bróður sínum, spýtti í lófana og var nánast eins og hann væri ekki lasinn. Föstudagar eru nefninlega tölvudagar, var mér sagt, þá mætti hann leika í tölvu. Sem hann gerði. Svo var ég að fara í boð og hann var bara feginn að losna við mig svo að strákapartýið gæti hafist!

Svona er maður ómissandi.

Spennandi framtíðarmöguleikar!!

2006-03-22T10:59:00.000Z

Fór inn á heimasíðu Bifrastar um daginn og fór að skoða nám sem þeir eru að bjóða. Ástæðan er einföld, skólinn er metnaðarfullur og býður uppá praktískt nám sem kemur að góðum notum á vinnumarkaði og fólk sem er menntað hjá þeim gengur auðveldlega inní góð störf.

Sá þetta nám hér: MA í Evrópufræði og varð strax mjög spennt.

Tel að þetta sé nám sem gæti reynst mér og minni tungumálakunnáttu afar hagnýtt, sérstaklega ef ég reyni að bæta spænskunni svo við mig að einhverju leyti. Gæti t.d. tekið hluta af þessu námi í skiptinámi á Spáni til að ná meiri tökum á því.

Já, framtíðin er full af möguleikum, en stundum getur verið erfitt að pússla saman vilja tveggja einstaklinga. Veit ekki hversu spenntur Arnar er fyrir því að flytja á Bifröst....????

Lífið heldur áfram....merkilegt nokk!

2006-03-21T14:47:00.000Z

Já, það er satt, það kemur dagur eftir þennan dag og loks virðist skapið vera á uppleið eftir fremur langa niðurveru. Komst að því að það býr alltof mikið af fólki í hausnum á mér og það án þess að borga leigu. Ekki smart!

Verð helgarmamma frá fimmtudegi til þriðjudags, fáum Einsa peinsa í lán meðan þau fara til NY, ekki slæmt. Held að hann sé spenntur fyrir að koma í heimsókn, leika við stóra bróður sinn soldið og vera dekraður.

Datt í hug að sækja um starf hjá Eve Online þegar ég sá auglýsingu frá þeim um starf sem ég fyllti allar kröfur í. Finnst gaman þegar ég sé auglýst störf, svona alvöru störf með titlum sem reynsla mín og menntun gera mig hæfa í. Var sko auglýst eftir manneskju með reynslu af erlendum samskiptum, góða tungumálahæfni og frönskukunnátta plús, að hafa starfað í markaðsmálum, séð um samingagerð o.s.fr. Ef ég teygi starfsreynslu mína, þá slefaði ég alveg uppí þetta og hefði verið fullkomin í þetta. En mundi þá skyndilega eftir því að ég kann ágætlega við mig í mínu starfi sem veitir mér það frelsi að geta unnið og verið í skóla þó að stundum sé erfitt að gera aldrei neitt nema vinna og læra. Og hætti við í skyndingu að skipta um starfsvettvang. Bækur heilla mig ennþá meira en tölvuleikir!!!

Annað merkilegt í fréttum? Já, alveg eins, við Arnar eigum 5 ára afmæli í byrjun Apríl og förum í tilefni af því á Hótel Búðir, ægilega rómantískt. Finnst súrrealískt að ég sem er svona ung sé búin að vera í sambandi svona lengi....það minnir mig á það að ég er kannski, bara kannski að verða fullorðin!

Jæja, vinna meira!

Hrjót hrjót

2006-03-15T08:38:00.000Z

Venjulega sef ég frekar illa, vakna oft og er bara til vandræða á nóttunni. Ræktin hefur hinsvegar fært mér það að ég sef, oftast heilan svefn nóttina í gegn og ef ég vakna, þá er það einu sinni.

Ég er samt frekar súr með kílóafjöldann sem tapast hefur þar en hann er alveg staðnaður einhvernveginn. Hef lítið sem ekkert misst eftir jólin, kannski 2 kíló og ég ætlaði að vera orðin 10 kílóum léttari þegar ég kæmi til Túnis sem þýðir að 8 kíló í land og tíminn meira en hálfnaður. Það þýðir samt ekki að ég sé búin að gefast upp, í síðustu viku var spýtt í lófana og ég mætti 5 sinnum og brenndi þar til svitinn bogaði hreinlega af mér.

Í þessari viku ætla ég að ná 5 skiptum lágmark og er að vonast til að ná 6. En þar sem ég komst ekki í gær, þýðir það að ég þarf að fara alla hina dagana. Ég vona að það náist.

Í gær vippaði ég einu 50% verkefni fram úr erminni. Það var samt ekki auðveld fæðing enda hafa ljóðagreiningar oft reynst mér erfiðar. En með smá þolinmæði og hjálp góðra vina þá hafðist þetta allt saman á endanum og á eftir verður þessu skilað. Hvort nokkuð sé varið í þetta á eftir að koma í ljós, sjáum til með það! En ég gerði allavegana mitt besta :)

Önnur erfið fæðing virðist ætla að vera árshátíð okkar í frönskunni þar sem erfiðlega hefur gengið að fá dagsetningar og staðsetningar til að passa saman. Held að málið sé í höfn í dag og hlakka mikið til að geta klárað það mál algjörlega.

Þó má ekki slá slöku við því nú er komið að næsta ritgerðaverkefni, á eftir að lesa 400 bls bók til að standa skil á því og það er á mánudaginn sem það þarf standa klárt. So, back upon that horse!!!!

Hvað með mig?

2006-03-12T11:11:00.000Z

Já, gott að dreifa visku í allar áttir en er kannski spurning um að gera eitthvað sjálfur í sínum málum?

Miklar pælingar í gangi!

Á jákvæðari nótum, í síðustu viku fékk ég fyrstu einkannir annarinnar og voru þær alveg til að hrópa húrra fyrir. Túnis ferðin er svo gott sem afgreidd, einungis eftir að ganga frá lestinni milli London og Parísar fyrir þá sem hana nota og árshátíð í sjónmáli þó að pússluspil sé í gangi núna með dagsetningar og annað.

Vísindaferð á föstudaginn í Ámuna. Ef ég drykki meira myndi ég tvímælalaust brugga. Greinilegt að þetta margborgar sig. Ég var á bíl svo að ég var ekkert að sökkva mér ofan í veitingarnar en fékk mér hinsvegar pínkulítið staupglas og setti í það einn sopa af vínunum sem voru í boði og niðurstaðan var sú að þetta er hið boðlegasta vín. Ég hélt alltaf að heimabrugg væri algjört eitur. Reyndar voru rauðvínin verst en þarna var gott rósarvín og þokkalegt hvítvín og rauðvínið hefði verið betra ef hann hefði gefið okkur eldra var mér sagt, það var víst bara búið að þroskast í mánuð á flöskunum sem er algjört lágmark.

Jæja, nú ætla ég að fara í brönch til tengdó....namminamm!

Að skríða ofaní holu?!!

2006-03-11T13:55:00.000Z

Þessi vika var langt frá því að vera góð. Vikan þar sem ég þurfti alla mína einbeitingu til að hlutirnir gætu gengið upp en í staðinn hefur hausinn á mér verið á fleygiferð.

Hélt að toppnum hefði verið náð en allt er þegar þrennt er eins og maðurinn sagði. Hef enga einbeitingu og á að vera læra undir próf og skrifa ritgerð en þyrfti helst að fara og gera mér glaðan dag og láta mér líða vel, allavegana betur.

Kannski hægt að rífa sig uppá rassgatinu, spurning með það að liggja ekki í eymd og velta mér uppúr þessu.

MERDE ALORS!!!

2006-03-05T17:07:00.000Z

Hvað á að gera þegar að grein sem maður strögglaði með að koma uppí tvær bls reynist eiga að vera 3 bls? Jú, maður finnur 10 mismunandi leiðir til að segja sama hlutinn, hæfileiki sem einkennir að mínu mati flesta fræðimenn.

Fjölskylduvæn helgi: Kristján Dagur, bróðursonur minn, sló í gegn í gær. Við Arnar slógum líka í gegn, leið að hjarta barnsins er að sjálfsögðu í gegnum nammið og því var ekkert til sparað. Hann gleymir því ekki í bráð hvað ég heiti! Svo var kvöldmatur á Bræðró með settinu og litla bróður sem er orðinn heldur stór ( og ég held að hann hafi verið þunnur ). Dagurinn var svo tekinn snemma í dag, fór á fætur kl 07 00, glápti á Survivor og Biggest Looser Australia, svona aðeins til að tæma hugann. Lagaði svo þetta drasl sem ég hafði skrifað í vikunni í þessum ritdómi, get greinilega ekki gert neitt af viti nema undir pressu og svo var bara skúra skrúbba bóna því tengdó var að koma í Brunch. Heimsótti Jóa Fel og bjó til spelt amerískar pönnukökur. Það er að segja bjó til deigið og Arnar sá um að steikja egg, beikon og pönnukökurnar ofan í skarann.

Svo hefur lærdómurinn átt hug minn allan. Er að fara inn á leiðinlegt tímabil í bókmenntunum en heiti því að vera jákvæð. Leiðindin stafa af tveim stefnum sem ég hef ekki tekið í sátt: súrrealisminn og exitensíalisminn. Já gott fólk, komið að Breton, Sartre og Camus..úff!!!

Og svo kom í ljós að ritdómurinn sem hefur ekki viljað út úr hausnum á mér alla vikuna á að vera lengri en upphaflega var áætlað....æj mig auma!!!

Sif frænka

2006-03-04T09:55:00.000Z

Ætla að sækja litla sæta frænda núna kl 11 og fá að hafa hann aðeins hjá mér í dag. Eyði alltof litlum tíma með þessu barni og í gær þóttist hann ekki muna hvað ég heiti. Held að þetta hafi hreinlega verið mótmæli, uss uss. En úr því skal bætt. Við ætlum að hitta tengdapabba minn og konuna hans og borða með þeim hádegismat og svo er ég í vafa um hvort gefa eigi öndunum brauð í ljósi fuglaflensunnar? Ef ég ætti frysti núna myndi ég tvímælalaust fylla hann af kjúlla því þegar flensan kemur til landsins þá efast ég um að fólk hafi geð í sér til að kaupa fuglakjöt. Kjúklingur er einmitt það besta sem ég fæ, góð kjúllabringa...en svona verður þetta sennilega. Þannig að þið sem eigið frysta, kaupið kjúlla og hendið í hann og bjóðið mér svo í mat þegar flensan kemur.

En já, best að fara og rækta frænkuhlutverkið!

Barceolona

2006-03-03T12:11:00.000Z

Kæra fólk

Þá er ég búin að skila inn formlegri umsókn um Erasmus, vorönn 2007 í Universitat de Barcelona. (varaskóli í París) Þetta verður tíminn okkar Arnars, við ætlum að njóta lífsins, læra spænsku og upplifa katalónska menningu.

Planið tók stökkbreytingum á síðustu vikunum fyrir umsókn og ástæðan var einföld. Ég hef búið í Frakklandi og hagnast kannski mest á því að prófa eitthvað nýtt. Barcelona er uppáhalds borgin okkar Arnars í Evrópu og okkur langar bæði frekar til að læra spænsku. ( mig langar að bæta henni við mig og hafa tvö rómönsk tungumál ) og þetta á að svara spurningu minni um það hvort mig langi raunverulega til að taka tvöfalt ba og þá með spænskuna líka.

Nú er þetta orðið officielt, býð svars við umsókninni en það er 100% að við hjónaleysin verðum allavegana ekki á Íslandi vorönn 2007, hvort sem leiðin liggur til Spánar eða Frakklands :) Get ekki sagt ykkur hvað ég er ánægð, mikill léttir að vera búin að skila þessu inn og þetta verður algjört ævintýri. Arnar að prófa að búa erlendis í fyrsta skipti og ég að endurtaka leikinn. Hver veit nema að Arnar kolfalli fyrir þessu og að við förum í framhaldsnám erlendis líka. Mikið sem ég væri til í það :)

Jæja...segi góða helgi!

Tíhíhí

2006-02-27T18:17:00.000Z

Laugardagskvöldinu var varið í góðra kvenna hópi, stelpnanna úr frönskunni. Dagskrá kvöldsins var ekki af verri taginu, við fengum til okkar góða konu sem starfar hjá Romantik.is sem hélt fyrir okkur kynningu á alls kyns nauðsynlegum varningi fyrir öll góð heimili :)

Konan góða mætti á svæðið með tvo kassa sem voru fullir af ýmiss konar dóti, sumt hafði ég nú séð áður og annað kom á óvart. Eitt var bersýnilegt, við stúlkurnar erum tengdar bleika litnum að eilífu. Megnið af varningnum kom nefninlega í bleiku sem einhvernveginn setti rómantískari blæ yfir þetta allt saman. Eitt eða á ég að segja einn fannst mér ekki svo rómó en þið getið séð það sjálf hérna . Þessi vakti upp mikinn hlátur hjá hópnum og miklar vangaveltur um göngulag kvenna daginn eftir að hafa rekist á þennan.

Það var mikið hlegið, mikið talað og mikið spurt og óhætt að segja að engin okkar hafi farið tómhent heim.

Nokkrar vel valdar og ritskoðaðar myndir verða settar inn á blogg frönskunnar, læt vita þegar það gerist!

Annað merkilegt frá helginni, rómantískir göngutúrar í Laugardalnum seint á föstudagskvöldi og svo bókamarkaður og göngutúr í Öskjuhlíðinni á laugardaginn. Lærdómurinn var tekinn með trompi í gær ásamt smá húsfreyjustörfum.

Nú er það bara alvara lífsins því á næstu tveim vikum skal eftirfarandi gerast:
- skila einni ritrýni, 3 bls um smásögu
- skila 7 bls ritgerð um ekki minna verk en Frú Bovary vinkonu mína. Pælingar um exítensíalíska þreytu eða hugsanlega hið óþreytandi "mal du siécle" sem elti rómantísmann...spennandi en kem mér ekki af stað.
- ljóðagreining á x bls fjölda ( vantar bls tal ) um ljóð eftir Baudelaire, mjög strangar reglur um uppbyggingu og pælingar og vex mér stórkostlega í augum.

Einnig skal tekið 1 próf í Bókmenntum 19 og 20 aldar og til að setja punktinn yfir i ið mitt þá er best að henda inn einu málfræðiprófi í kaupbæti.

Og hver segir að kennarar kunni ekki að samhæfa sig?

Þetta er engan veginn nógu krefjandi fyrir mig svo ég ætla að henda inn eins og 40 tímum af vinnu og skipulagsmálum tengdri Túnisferð sem er heldur betur yfirvofandi ásamt skipulagningu á árshátíð fyrir deildina.

GOTT AÐ MÉR LEIÐIST EKKI :)

Mmm...ég hlakka til!!!

2006-02-24T21:45:00.000Z

Bókuðum flug í gær og förum 13. maí, fæ fimm daga í Paradís með sætustum

La Primavera ekki svo mikið primó

2006-02-24T10:48:00.000Z

Jæja, var að koma heim úr ræktinni, einn kaffibolli og blogg og svo skal lært eins og mófó. Smásögupróf og fyrirlestur á mánudaginn og svo þyrfti ég að skella saman eins og einni rýni á eina aðra smásögu sem er reyndar þrælskemmtileg.

Bauð mínum heittelskaða út að borða í gærkvöldi á La Primavera í tilefni Food og Fun þar sem hægt er að borða 4 rétta fyrir hófsamlegt verð miðað við okkar litlu eyju.

Forrétturinn var svona sample diskur með tveim tegundum af hráskinku, gorgonzola, mozzarella ferskum, ólífum og einhverju fleiru sniðugu og var alveg ágætur ( ekkert kraftaverk á bak við það að raða hlutum úr pökkum á disk ).

Antipasto var svo eitt stykki af saltfisks raviolo sem var áhugavert en ekkert meira en það.

Aðalrétturinn var svo frampartastykki af einhverju lambi sem var hægeldað í 6 tíma með kartöflum og einhverri mús.

Desertinn var svo frönsk súkkulaði með einhverju sem átti að vera panna cotta en var heldur langt frá því að vera það.

Verð að segja að þetta olli miklum vonbrigðum og það eina sem fær 5 stjörnur þetta kvöld er félagsskapurinn sem var einstakur og svo rauðvínsglasið sem var drukkið með því það var mjög gott. Gorgonzolann var stórfenglegur líka en það skrifast ekki á kokkinn. Ég hef borðað betri mat á Primavera í hádeginu en þá eru þeir með þriggjaréttað fyrir hófsamlegt verð og það hefur verið mjög gott hjá þeim.

Uss puss, þessi útlenski kokkur má bara fara heim til sín!

Annað kvöld verður romantik.is en með öðrum hætti en ætla mætti, hjálpartækjakynning í kópavoginum og ætla stelpurnar að leggjast í mikla eyðslu. Þetta verður kvöld með píkuskrækjum í margföldu veldi og ég hlakka bara til!

Góða helgi

Ekki lasarus lengur

2006-02-21T14:55:00.000Z

Jibbý, komin út aftur eftir veikindin sem er alltaf ágætt. Vigtin þokast niður á við hægt og rólega, reyni að vera þolinmóð eftir fremsta megni þó þolinmæðin hafi ekki alltaf verið mín sterkasta hlið!

Túnisferðin lítur betur út og þessi vika bjartari en sú síðasta. Ekki skemmir að ég er á leið í hjálpartækjakynningu í boði frönskudeildarinnar og romantik.is á laugardaginn og á von á miklum píkuskrækjum og skemmtilegheitum.

Lasarus

2006-02-18T08:08:00.000Z

Úff, alla vikuna gekk ég með svona flensutilfinningu í maganum, var öll skrítin í líkamanum og í gær fann ég að þetta var bara að bresta á. Lét það samt ekki aftra mér í brjálaðri tiltekt á vinnustaðnum og púlaði og hamaðist þrátt fyrir svitakóf og svimaköst. Fór svo í dinnerboð hjá vinnuveitandanum eða eins og ég hef kallað hann í mörg ár, stóra bróður mínum. Meikaði það ekki í gegnum desertinn og varð frá að hverfa áður en heimalagaði ísinn og marssósan náði á borðið...djö! Svaf svo tæpa 4 tíma í nótt og sit nú fyrir framan skjáinn í svitakófi, guð minn góður! Rennur af mér svitinn og ég á leið í Kolaportið til að safna fyrir Túnisferð sem ég veit ekki einu sinni hvort verði farin. Lífið er dásamlegt. Er með smá hita en ætla samt að mæta og sinna mínum skyldum áður en ég leggst alveg núna seinni partinn. Planið er að vera komin heim milli 13 og 14 og þá get ég tekist á við það að ég sé lasin. Sex and the City seríurnar biða mín allar hérna, keypti þær í fríhöfninni og því mun ekki vanta afþreyinguna!

Stundum er það helvíti hart að vera svona samviskusamur, vildi óska þess að ég ætti meira kæruleysi í mér.

Örvænting á sunnudegi!

2006-02-12T12:46:00.000Z

Kaffikannan ónýt, mokka kannan týnd og próflestur í undirbúningi! Hvað gera bændur þá? Jú, það er bara hellt uppá á gamla vísu sem er svo sem ekkert verra, bara tímafrekt! Kaffi komið í bollann og ég til í slaginn.

Ágætt að læra um rómantíkerana eins og Hugo í janúar depressjóninni, það á svo ágætlega við því þeir voru svo ægilega dramatískir, en það er ég líka þessa dagana!

Margt að gerast í toppstykkinu, margar pælingar í gangi varðandi Erasmus draumana og sjáum hvað setur.

P.s. vill einhver gefa mér nýja mokkakonnu, kvörn til að mala kaffibaunir og svo svona dót til að flóa mjólk? Mér er spurn!

Ættu betur heima í ruslinu?

2006-02-11T21:00:00.000Z

Óheyrilegt magn af slæmum lögum sem rötuðu í sjónvarpið síðustu vikurnar í nafni forkeppni Eurovision.

Horfði á svona upprifjun núna og það versnaði bara og versnaði og varð alveg svart þegar það var eitthvað lag með blandí poka fíling, rapp og country saman, kona í bleikum kjól að syngja ægilega væmið og svo kom töffara rappari...hvað var það eiginlega?

Saga Íslands í Eurovision er sorgleg!

það sem ég græt mest samt er að horfa á eftir peningunum sem RÚV eyddi í þetta bingó allt saman og koma beint úr mínum eigin vasa þar sem ég er tilneydd til að borga í þetta. Mín vegna hefði mátt draga einn af þessum hroðbjóðum uppúr hatti random og senda þarna út. Hefði engu breytt!

Það eina sem lífgar uppá þetta er að sjálfsögðu Til hamingju Ísland sem hefur loks graspað almennilega conceptið og Silvía Nótt fær vissulega mitt atkvæði enda ekkert verra að segja hlutina bara eins og þeir eru!

Heima er best

2006-02-07T16:09:00.000Z

Jæja, þá er maður kominn aftur frá London.

Yndisleg ferð í alla staði og algjör stelpuferð. Mikið verslað og mikið slúðrað, drukkið soldið hvítvín og bjór inná milli, borðaður góður matur, farið í sirkus og á söngleik, vínsmökkun, londoneye og Dalí safn fyrir suma en Aquarium fyrir aðra. Lærði margt á þessari ferð en stærsta lexían var auðvitað að geta sofið án Arnars. Fyrsta nóttin var hræðileg svo ekki sé meira sagt en það vandist alveg.

Dásamlegt að geta verslað án þess að vera með samviskubit yfir því að Arnari leiddist og yndislegt að dúlla mér á markaði í marga klukkutíma. Sumt getur maður bara ekki gert með kærastanum sinum!

Breytir því ekki að það var æði að koma heim og fá knús og kúr en þess var sárt saknað í London, Herbertinn minn er bara ekki mikið fyrir að kúra með mér. Mín beið blómvöndur sem ilmaði og nýklipptur kærastinn og hef helst ekki viljað sleppa honum siðan þó að ég hafi nú neyðst til þess.

Við stúlkurnar erum samt enn að jafna okkur enda var tekið harkalega á því í þessari ferð, dagskrá frá 10.00 til 12.00 á miðnætti en þá lullaðist maður inn á hótel og lognaðist út af eftir slúðurtörn og tilheyrandi. Úff hvað það getur stundum verið þreytandi að hafa það gaman :)

WorldClass

2006-02-01T11:19:00.000Z

Er fyrirtæki sem mun aldrei sjá krónu frá mér framar, hef aldrei átt í samskiptum og viðskiptum við eins fáránlegt viðskiptaapparat eins og þetta fyrirtæki sem byggir viðskipti sín á svikum og prettum eftir því sem ég fæ best séð.

Gerði tímabundinn samning uppá 12 mánuði og vildi losna eftir 6 en það er ekki hægt svo að ég harkaði af mér. Nema kemur í ljós að samningurinn var í raun 14 mánuðir en ekki 12 eins og talað var um. Ekki nóg með það heldur hækka þau verð á samningnum án þess að það sé talað um það þar og án þess að láta vita. Bera við sig vísitöluhækkunum. Gott og vel, en þú gerir það ekki á gildandi samningi sem er uppá ákveðið verð.

Mæli með að fólk færi viðskipti sín annað en í World Class! Er dauðfegin að vera laus við þau, því eftir hávaðarifrildi er ég laus undan þessum auka 2 mánuðum.

Bæjó, farin til London

Vangaveltur?

2006-01-31T16:55:00.000Z

las póst á blogginu hjá Betu Rokk um þann ágæta mann Geir Ólafs. Hef takmarkaða skoðun á þessum manni, finnst hann jafn hallærislegur og öðrum finnst en held að það sé ekkert persónulegt.

Beta Rokk dregur hann hinsvegar algjörlega niður í svaðið, talandi um alkahólisma konunar hans og hvernig hún lemur hann o.s.fr. í "Opnu bréfi til Geirs Ólafs" á síðu með yfir 200 lesendur á dag.

Hvað finnst ykkur um þetta? Mér ofbauð svo að ég hálf vorkenndi ræflinum sem ég held reyndar að gangi ekki alveg heill til skógar sem gæti útskýrt svo margt...! Maður verður að stíga varlega í nærveru sálar að mínu mati og ekki gera svona hluti á opinberum vettvangi enda ekki um málefnalegar umræður að ræða. Æjá...og þannig fékk Geir Ólafs mig til að þykja oggupínku vænt um hann því ég vorkenndi honum...átti ekki von á því.

Getið lesið pistilinn hér:

Lífið leikur annars við mig þessa dagana, komin í einkaþjálfun hjá yndislegum þjálfara sem hugsar svakalega vel um mig og svo er Arnar svo happý þessa dagana út af nýju vinnunni sinni að það smitar út frá sér á mig og okkur bæði. ´

Fórum út að borða á sushi staðinn fyrir ofan Iðu á laugardaginn og fengum geggjað gott sushi og svo fórum við á Austur Indía félagið á sunnudaginn...mmm nammi gott :)

Annað kvöld verð ég svo komin á góðan bar með góðum vinkonum í æðislegri borg. Segi ykkur það samt að það verður eflaust jafn gott að koma heim eins og það er að fara út. Sem er frábært!

Kveð í bili, farin í húsmæðraorlof!!!

ps. Greys anatomy er nýja uppáhaldið mitt, brosi, hlæ og grenja til skiptis yfir þessu...maður er svo simple

Blendnar tilfinningar!

2006-01-27T12:04:00.000Z

Amm, er að fara til London á miðvikudaginn með stelpunum. Hlakka mikið til en er líka pínku leið! Er nefninlega að fara í fyrsta skipti frá kallinum mínum....síðast þegar við eyddum ekki nótt saman, var fyrir 4 árum og ég man ekkert eftir því, síðan þá hef ég bara alltaf haft hann hjá mér á nóttunni sem ég kann lang best við!

Ný lífsreynsla!

Verðum samt massa stuð úti! Stærsti sirkus í heimi, Neal Street og skórnir, Guys and dolls söngleikur, H&M og fötin, vínsmökkun og London Eye! Svo verður jafnvel kíkt í hvítvínsglas ;)

Hola chicos

2006-01-26T16:42:00.000Z

Fór til einkaþjálfarans áðan, líst ótrúlega vel á þetta, nú verður þetta sko massað! Múhaha!

Var með vel heppnað partý um síðustu helgi niðri í Alliance á vegum frönskunnar. Minnti mig á það hvað það er frábært að tilheyra lítilli deild, það er svo mikil nánd, kennararnir að skemmta sér með okkur og allir að fíla sig og þekkja alla með nafni sem er stórkostlegt! Mæli með þessu.

Malaga, Sevilla eða Valencia eftir áramót að læra spænsku? Hvernig væri það nú?

Og áfram heldur það!!!

2006-01-17T14:27:00.000Z

Ef einhver þorir…..

1. Hver ert þú?
2. Erum við vinir?
3. Hvenær hittumst við fyrst og hvernig?
4. Ertu hrifinn af mér?
5. Langar þig að kyssa mig?
6. Láttu mig hafa gælunafn og útskýrðu afhverju þú valdir það.
7. Lýstu mér í einu orði.
8. Hvernig leist þér á mig þegar þú sást mig fyrst?
9. Lýst þér ennþá þannig á mig?
10. Hvað minnir þig á mig?
11. Ef þú gætir gefið mér eitthvað hvað myndi það vera?
12. Hversu vel þekkiru mig?
13. Hvenær sástu mig síðast?
14. Hefur þig einhvern tíman langað til að segja mér eitthvað en ekki getað það?
15. Ætlaru að setja þetta á bloggið þitt svo ég geti skrifað um þig?

Og ein frá gamlárskvöldi!

2006-01-17T08:40:00.000Z

Ójá...gleymdi...

2006-01-17T08:37:00.000Z

Datt í hug að það gæti verið gaman fyrir ykkur að sjá þessa skemmtilegu mynd :) Hún er tekin í grímupartý frönskudeildarinnar, þegar sófinn brotnaði og löggurnar komu tvisvar! Geri aðrir betur!

Fleiri myndir úr partýinu er hægt að skoða á www.franska-gallia.blogspot.com

Mikilmennskan

2006-01-17T08:32:00.000Z

Síðasta einkunnin kom í hús og var sú hæsta sem ég hef augum litið en olli miklu mikilmennskubrjálæði hjá undirritaðri. Ákvað að skynsamlegt væri að troða mér í 20 einingar þar sem allt var svo skemmtilegt og yndislegt í skólanum og ég svona svakalega klár!

Erfiðasta verkefni annarinnar er Spænska fyrir byrjendur 2. Ég lærði spænsku í MH hjá henni Túliníus vinkonu minni en verð að viðurkenna að þegar ég flutti til Frakklands lokaði ég þennan part heilans úti og einblíndi bara á frönskuna og hef því miklu týnt. Mætti í tíma og fékk námsáætlun á spænsku en lét ekki slá mig út af laginu og skrifaði eins bls ritgerð um hvað ég gerði í síðustu viku...hlakka til að fá hana rauða og útbíaða til baka!

Kennarar hafa loks skilið tilgangs náms og þó að ég sé í svona mörgum einingum lítur út fyrir að einungis tvö lokapróf verði á þessari önn, eitt 60% en hitt einungis 30%. Vill samt setja út í alheiminn kenningu mína um að þau verði vissulega þau öftustu á próftöflu, nú eða eitt fremst og eitt aftast. Þannig er karmað bara!

Kveð að sinni, ætla að fara og lesa Öskubusku á frönsku!

Mindcamp

2006-01-14T09:47:00.000Z

Fór á generalprufu í gær í Hafnarfjarðarleikhúsinu.... góður húmor, flott uppsetning en tormelt...ég er enn að melta textann sem var snilldarlega skrifaður og sem betur fer fær maður hann með sér þegar maður fer heim....svo maður getur notið hans almennilega!

My best friends wedding

2006-01-04T11:23:00.000Z

Nei...enginn að fara að gifta sig...bara að spá í myndinni sem mér finnst æði.

Sofnaði út frá henni um daginn og svo datt hún þá inn á valmyndina fyrir myndina með tilheyrandi tónlist....síðan þá sönglar í hausnum á mér

"wishing and thinking and hoping and praying, planning and dreaming...Show him that you care just for him, do the things that he likes to do, wear your hair just for him, cause you won't get him, thinking and a praying wishing and a hoping....

Ekki leiðinlegt lag að vera með á heilanum því þó að textinn sé ekki alveg málið þá er lagið sjálft svo mikið happy happy joy joy!

Byrjaði á bók eftir Balzac í gær. Hún byrjar á umfjöllun um dramað í bókinni og segir svo " ef þú lesandi góður, heldur á þessari bók í þinni HVÍTU hendi" og fannst það soldið skondið. Racismi er alls staðar!!!

London 1-5 feb.....verður svaka stuð...bara við stelpurnar.....újé!

The sound of music

2006-01-03T12:07:00.000Z

Arnar fékk heimabíó í jólagjöf og í því er leikin tónlist þessa dagana fremur en kvikmyndir á meðan beðið er eftir 32" lcd sjónvarpinu sem fylgdi með heimabíóinu. Nú ætla ég að fara og kaupa mér nokkra geisladiska hugsa ég...m.a. Anthony and the Johnsons.....heyrði lag með honum í útvarpinu og fannst það snilld. Annar ofarlega á listanum er Ampop...nýji diskurinn þeirra er frábær! Svo langar mig að eiga Damien Rice disk en þann mann ætla ég að sjá á tónleikum núna á föstudaginn og hlakka mikið til. Hefði samt viljað sjá hann í minna locali en höllinni en maður tekur hreinlega því sem býðst...ekki satt?

Áramótaheitin þetta árið voru engin...sakna þess soldið að hafa ekki gert nein. Áður fyrr var ný dagbók opnuð á þessum degi og byrjað á áramótaheitunum áður en almennt væl tók við um hitt og þetta...fyllti heilu bls af væli og sjálfsvorkunn hér áður fyrr...alveg glatað að lesa það í dag.

Og já...ég las ömurlega bók um daginn...sennilega með verri bókum sem ég hef lesið um ævina. það var bókin Djöflaterta sem leit skemmtilega út, í bleikri kápu sem höfðaði svo mjög til mín. Ritstjórn og prófarkalestur var greinilega ekki ofarlega í huga útgáfunnar en svo virkaði efnið engan veginn heldur, plottið hreinlega gekk ekki upp og endirinn var lousy. Vantar almennilegan íslenskan skutluskáldskap hingað, svona í anda Dís. Kannski ég ætti bara að skrifa eina svona skutlubók.....hmm?

2006

2006-01-02T09:23:00.000Z

Árið 2005 kvatt með glæsibrag. Við borðuðum 6 heima á Kleppsveginum, heitreykt gæs og foie gras í forrétt, fyllt lambalæri með öllu tilheyrandi í aðal og heimagert Tiramísú í eftirrétt. Svo var horft á þetta ömurlega áramótaskaup, held að það hafi aldrei verið verra...ég eiginlega skammaðist mín fyrir það og svo voru það flugeldarnir. Frakkarnir horfðu dáleiddir á upplýstan himininn og svo var skálað með kampavíni þegar nýja árið gekk í garð. Svo streymdi inn allt skemmtilegasta fólkið og það var mikið hlegið, alveg fram undir morgun. Heimsótti rúmið mitt um 7 leytið og fór varla þaðan allan daginn.

2005 var gott ár. Við fórum tvisvar til útlanda, bæði skiptin til Parísar, ferðuðumst innanlands og 25. aldursárið hófst með glæsibrag. Nýjir sigrar voru unnir í skólamálum, ég hækkaði meðaleinkun mína og Arnar, hann sló í gegn í Öldung meðfram vinnunni og eru 10 einingar í höfn, stúdentinn í sjónmáli og er ekki frá því að tengdó sé farin að baka í huganum fyrir veisluna sem á að halda. Hann landaði draumastarfinu sínu og ég tók að mér mikla vinnu meðfram skóla. Nóg að gera. Er bara mjög sátt með þetta ár.

Hef góða tilfinningu fyrir þessu ári, planaðar eru þrjár utanlandsferðir og Afríka verður meira að segja heimsótt. Ekki glatað það. London í febrúar með bestustunni og árshátíðarför er í vændum skilst mér í apríl. Nammi namm. Meðal annarra hluta eru nýjir sigrar og stefnur í skólamálum, áframhaldandi ganga í átt að stúdent fyrir A og umsókn fyrir Erasmums. Ákveðið hefur samt verið að láta eina önn duga og fara út eftir áramótin en vinna þeim mun meira fram að þeim tíma. Draumurinn er að klára skóladæmið í janúar og vonandi eiga þá jafnvel smá aur í afgang til að leggjast í smá flakk....aldrei að vita hvað verður.

En allavegana...gleðilegt ár kæra fólk!

Gleðileg jólin

2005-12-24T15:10:00.000Z

Elsku þið öll

Engin voru jólakortin í ár sökum annríkis á heimilinu en lofa breytingum þar á um næstu jól.

Hátíð ljóss og friðar runnin í garð eftir mikið annríki, lasleika og uppsafnaðan þreytuhaug sem fær að líða úr manni á næstu dögum. Franskar skvísur væntanlegar á klakann 27 des sem mun heldur betur lífga upp á heimilslífið og svo er kallinn að byrja í nýrri vinnu. Mörg ævintýri framundan og almenn kátína í höllinni!!!

Jólaknús!

Ég var næstum búin að gleyma...

2005-12-08T17:48:00.000Z

Settu nafnið þitt í kommentakerfið og.........

1. Ég segi þér eitthvað handahófskennt um þig.
2. Ég segi þér hvaða lag/mynd minnir mig á þig.
3. Ég segi þér hvaða bragð minnir mig á þig.
4. Ég segi þér fyrstu ljósu minninguna mína af þér.
5. Ég segi þér á hvaða dýr þú minnir mig á.
6. Ég spyr þig að einhverju sem ég hef velt lengi fyrir mér um þig.
7. Ef þú lest þetta verðuru að setja þetta á bloggið þitt!

Thorsararnir

2005-12-07T08:51:00.000Z

Ég tala sjaldan um íslenskt bókmenntalíf, nema í skjóli fjölskyldu minnar og vinnu, sennilega vegna þess að ég er mjög lituð af mínu eigin. En get þó ekki setið á mér að tjá mig um Thorsarana. Finnst ótrúlegt að ritskoðun sé komin upp á pallborðið aftur og að það sé staðreynd sem höfundar landsins þurfi að óttast í dag. Þeir geta snúið þessu eins og þeir vilja, þetta var ekkert annað en ritskoðun og alveg á hreinu að þessi kafli um þetta hjónaband hafi farið út því ósamræmið í lygum útgáfustjórans og neitun höfundar til að tjá sig um málið segir allt sem segja þarf. Að farga heilu upplagi af bók þýðir kosntað upp á einhverjar millur, en það hefur augljóslega verið vel þess virði fyrir þá. Mikið vildi ég að ég ætti eintak af útgáfunni sem var fargað eða að einhver kæmi fram með það eintak. Hinsvegar langar mig ekki í eintak af nýju útgáfunni, styð ekki ritskoðun!

Helgin sem aldrei kom

2005-12-05T07:14:00.000Z

Helgin búin en ég tók svo sem ekkert eftir því að það væri helgi enda lært alla helgina. Búin að lesa mig í hel af heimspekilega þenkjandi greinum sem mættu margar hverjar fara í ruslið en aðrar eru skemmtilegar. Hrifnust er ég af Ofurmenni Nietsche sem Línu Langsokk. Greyið hann var misskilinn og lengi vel héldu Nasistarnir að þetta ofurmenni væru aríarnir en svo er ekki. Ofurmennið er hreinlega einhver sem þorir að vera sá sem hann er án þess að skilgreina sig út frá öllum öðrum, að hafa ekki þörf fyrir að fylgja öllum hinum en móta sinn eigin heim án þess að troða honum upp á aðra, engin meðvirkni í þessu ofurmenni en ég hef svo sem lengi haldið að aðeins ofurmenni væru ekki meðvirk!!!

Stressið hefur tekið sér búsetu í líkama mínum óboðið eins og venjulega. Minna þó fyrir prófin og meira fyrir það sem tekur við 12.desember á hádegi. Þá skal brunað í JPV og sinna málum af minni einstöku lægni fram að 23.desember. Það verður ekki lítið að gera get ég sagt ykkur.

Allt þetta skal þó gert heilum 8 kílóum léttari sem hlýtur að gera þetta auðveldara og kannski næst markmiðið um að hafa náð 10 kílóum fyrir jól....hver veit!

Bakaði í gær, tilraunir með bókina hennar Sollu, bakstur með spelti og engum sykri en sætt með sykurlausum ávaxtasultum...þetta var ágætt...en engin rjómaterta enda svo sem ekki við því að búast. Bakaði spelt kanelsnúða og bláberjamúffur og brauð líka.

Farin að læra meira...Framfaragoðsögnin ógurlega bíður mín.

hey já....konur eru fífl ef tekið er mark á grikkjum til forna. Greyið karlarnir þar...þeir höfðu það svo gott, eignuðust eingetin börn og lifðu hinn gríska draum án kvenna en svo komum við, spillingin og eyðilögðum þessa einingu...man we suck!!!!

Kleópatra

2005-12-03T14:56:00.000Z

Helló

Er komin með einhverja kleópötru klippingu og hef aldrei fengið jafn mikið af jákvæðri athygli á einu kvöldi, hrósunum rigndi yfir mig allt kvöldið í gær í útgáfuhófi JPV Útgáfunnar sem var með einsdæmum skemmtilegt ef einhver var að spá í það. Hitti helling af snilldar fólki sem hefur fylgt mér lengi. Ótrúlega skemmtilegt fólk sem vinnur í þessum bransa.

En sumsé, hárið er geggjað og 7 kíló farin. Keypti miða á Hættu tónleikana og er að reyna að tæla Fish til landsins á Bjarkar tónleika með meiru.

Er búin að vera í efahyggjunni í morgun. Held að það sé spennandi staðreynd í okkar veruleika en svo sannarlega hlutur sem getur leitt mann í endalausar eilífðarpælingar um allt og sennilega valda því að maður gæti ekki labbað út heiman frá sér því samkvæmt efahyggjunni gæti ég allt eins verið heili í krukku og allt annað blekking. Áhugaverð pæling ekki satt?

Áfram með smjörið!

2005-12-02T11:31:00.000Z

Lúlú...eru allir í stuði? Prófatíminn hafinn og ég búin að lesa fimm greinar í fílunni en dagurinn í dag fer fyrir lítið...er nefninlega að fara að láta laga hárið mitt, klippa og lita yfir það sem ég held að séu grá hár....sýndist ég nefninlega sjá nokkur þarna í hausnum á mér. Sjáum til með það.

Helgin, 9urnar og fleira!

2005-11-27T12:24:00.000Z

Hefði ekki þurt að hafa svona miklar áhyggjur af fyrirlestrinum, fékk 9 fyrir hann :) Er frekar sátt.

Vaknaði upp við vondan draum í gærmorgun, hafði fengið 5 fyrir ritgerðina mína um hana Mélusine sem ég var ekki að sætta mig við, spurði síendurtekið kennarann hvort ekki væru um mistök að ræða og þetta ætti að vera 9a. Sjáum hvað setur því ég fæ hana til baka á morgun.

Einkannir annarinnar eru því undarlegar, það eru þrjár níur og svo ein 6,3. Svo í næstu viku fæ ég tvær einkannir í viðbót þannig að það verður áhugavert að sjá hvernig þetta kemur út með 50% vinnu og nemendafélagi.

Tók hugtakið "shop till you drop" alveg í orðsins fyllstu merkingu í gær í fríðu föruneyti móður minnar. Við komum, sáum og sigruðum. Árangurinn lét ekki á sér standa, ég kom heim með tvenn pör af skóm, þrenna boli, eitt pils, tvennar buxur, fancy sokkabuxur og tvenna nýja augnskugga. Er með gullskó frátekna í skóbúð og er að láta mig dreyma um að kaupa þá líka og fullkomna skósafnið þar með fyrir jólin. Í tilefni af þessu hefur morguninn farið í að taka til í fataskápnum. Ég á föt úr fatastærð 36 og uppúr. Góðan slatta af fötum í stærð 10-12 sem var stærðin eftir Frakkland, enn meira af fötum á bilinu 14-16 sem var stærðin eftir fyrsta árið mitt í sambandi og enn meira af fötum í stærðum sem ég kæri mig ekki um að hafa eftir en finnst soldið fyndið að eiga svona mikið af fötum. Er búin að sortera í rusl, kolaportsbúnka og svo föt sem ég ætla að máta þegar ég kemst í þá stærð aftur til að sjá hvort ég fíli þau ennþá. Ég á í raun nóg af fötum til að fylla fataskápinn minn þrisvar í augnablikinu. En skórnir, það er sko það besta með skóna að þeir passa alltaf á mann ( nema reyndar 4 pör af stígvélum sem passa ekki utan um ökklan á mér í augnablikinu og bíða mín ). Þess vegna held ég að ég eigi svona mikið af skóm, því þó að fatastærðirnar hafi flökt í gegnum árin hefur skóstærðin haldið sér! Anywho....lífið er bara helv. gott. Fór í afmæli í gær, hitti vinkonurnar og spjallaði um heima og geima....töff tímar framundar með miklum lærdómi og enn meiri vinnu en svo koma líka jólin og með þeim 2 sætar franskar stúlkur sem ætla að skemmta mér milli jóla og nýárs. Og svo gamlárspartý á Klepparanum að vanda! Nóg að gerast.

Ætla að taka til meira!

btw...viljið þið ekki kaupa einhvern dýrindis varning af mér? skeini, eldhúspappír, gæðapappír, plastpoka af öllum gerðum, jólakort eða jólapappír? Svo er einnig í boði allar bækur JPV með 15% afslætti innpakkaðar og fínerí!???

How to go out with a bang?

2005-11-23T09:02:00.000Z

Er að vinna fyrirlestur sem ég ætla að flytja á morgun um eitt af Pléiade skáldunum. En hvernig skal fyrirlestur endaður þannig að hann skilji áheyrandann eftir fullan af áhuga o.s.fr.?

Ég hef nefninlega alltaf endað fyrirlestra einhvernveginn þannig að segja fólki " Jæja, núna er ég búin" í von um að þau annað hvort spyrji spurninga eða klappi svo ég sé laus allra mála en ég uppgötvaði nýverið að það þykir ekki smart endir á fyrirlestrum. So what to do?

Afmælisbarn dagsins!

2005-11-17T08:43:00.000Z

Uppáhaldsmanneskjan mín, AHG er 25 ára í dag!!!!!

2005-11-11T12:04:00.000Z

Ekki meira en það?

2005-11-08T12:53:00.000Z

You Are 50% Weird

Normal enough to know that you're weird...
But too damn weird to do anything about it!

How Weird Are You?

Í heimi þagnarinnar!

2005-11-04T10:31:00.000Z

Hvar er hann, þessi heimur þagnarinnar? Auðvitað Þjóðarbókhlaðan, hvað annað. Dásemdin ein því minn heittelskaði kom mér á HI netið og nú get ég setið hér, þóst læra en í raun surfað um netið. Væri raunhæft ef ég kynni að sörfa um netið. Skoða bloggsíður og pirra mig á sinnuleysi vina og vinkvenna, hirðuleysi mikið ríkir á bloggsíðum landans. Þaðan fer ég á mbl.is og les slæmar fréttir um óeirðir og ljótar fuglaflensur, svo skoða ég HI póstinn minn sem tilkynning mér menningarlega fyrirlestra sem ég get ekki sótt sökum menningarlegrar minnimáttarkenndar minnar og þá er ekkert eftir nema að skoða stöðuna á bankanum sem ég reyni yfirleitt að forðast í lengsu lög sökum slæmrar samvisku í eyðslumálum. Og þar með líkur tilvist minni á netinu.

Fór tvisvar í bíó í vikunni sem er mögnuð tölfræðileg staðreynd miðað við hinar vikur ársins. Sá Assassination of Richard Nixon og ákvað að Sean Penn væri með betri leikurum og svo sá ég In her shoes og ákvað að vera skotin í Toni Collette úr Muriels Wedding. Myndirnar mjög ólíkar en báðar höfðu jákvæð áhrif á sálartetrið mitt sem þjáist þessa dagana af stressi og álagi og í svo miklum mæli að ég nenni engu! Nema kannski að horfa á One Tree Hill þar sem stærsta áhyggjuefnið er hvort Dan verði borgarstjóri og hvort hjónin nái saman á ný, nótabene eru þau gift á lokaári í High School sem samræmist ekki alveg siðum okkar hér í Vestrænu löndunum.

Æjá...svo er föstudagur, tvö partý í dag og bæði eru tímasett fyrir kl 20.00 sem er undarlegt á föstudegi en svona eru menningarvitarnir!

Mágur minn

2005-10-29T16:49:00.000Z

Fengum hann lánaðann í nótt. Hann er 5 að verða 6. Ég sótti hann í brjálaða veðrinu á jeppanum hans pabba. Börn eru dásamleg. Hann fékk Madagaskar pez kall og það var mikið ánægjuefni. Elska einfaldleikann í börnum. Hann lék sér hérna með einhvern prinsessusprota sem ég fékk í afmælisgjöf og svo hárkamb. Horfði á meðan á Bionicles 3 á útlensku sko! Aljgör gæji!

Kannski fæ ég litla frænda minn lánaðan í nótt...ef mamma treystir sér ekki að vera með hann því hún er lasinn. Hann er að fara að eignast systkini. Það er orðið opinbert, stóri bróðir á von á barni nr 2, mágkona er sett á afmælisdag pabba og ég kalla barnið Jóhönnu Sif :) Við höldum nefninlega að þetta sé stelpa.

Og fyrirlesturinn gekk svona líka vel, stóð fyrir svörum í klst um kennslumálefni Frakklands, fékk mikið hrós og náði að involvera samnemendur mína með einum eða öðrum hætti og svo auðvitað kennarann líka því hann er jú eini frakkinn í bekknum.

Heimsótti blómaval í dag og eyddi peningum. Kaupa nokkur blóm til að lyfta upp á myrkrið, orkídeu og bonzai tré og svo einn nóvember kaktus. Hversu lengi verð ég að stúta þessum blómum?

Og heilsuátakið hefur dugað nú í næstum 2 vikur, enginn sykur, ekkert hvítt hveiti, engar kartöflur, ekkert gos...meira að segja ekki mitt heittelskaða COCA LIGHT. Er nú bara nokkuð hress, farin að spjalla við fólk í heilsubúðum um ristilinn á mér en það er nokkuð sem heilsufrík ræða af miklum krafti. Hefði aldrei grunað að fólk væri svona út úr skápnum með ristlana sína. Þetta þykir spennandi umræðuefni, hvaða hreinsun fólk valdi sér og hvort það sé með viðkvæma ristla eða ekki. Ég roðna nú ennþá við að tala um þetta enda ristilumræður bara umræður um kúk. Enda er ég kölluð tepra af þeim sem þekkja mig smá. Ég fíla ekki orð eins og píka og ríða og verð vandræðaleg þegar að fólk vill endilega ræða við mig um þessi mál sín. Sem gerir það auðvitað meira spennandi að ræða það við mig.

Jæja, best að hætta þessu blaðri. Ég er að lesa Mélusine. Mélusine er álfkona eða svona díabólísk vera frá miðöldum. Hún giftist manni og sest að í mannheimum en örlög hennar verða alltaf slík að maðurinn kemst að raun um halann hennar eða aðra hluti ( látum vera að hann hafi ekki komist að því þegar að hún getur af sér börn með þrjú augu ) og þá hrynur þeirra heimsveldi sem þau byggja upp á visku hennar og hæfileikum einum saman. Kvenfyrirlitning finnst mér nú lítil í Mélusine, þó hún sé díabólísk þá er hún andskoti snjöll! Bein tenging auðvitað þar á milli á Miðöldum ;)

Í sturtu

2005-10-27T07:32:00.000Z

Ég vaknaði kl 7. Fór í sturtu og flutti fyrirlestur í henni fyrir sjálfa mig á frönsku. Falin myndavél hefði vakið mikla lukku er ég viss um, að þvo á mér hárið á meðan að ég segi "Bonjour, je m'appelle Sif et aujourd'hui je vais parler de l'enseignement en France, on va regarder un peu le structure...." sem útleggst á íslensku sem svo: "Ég heiti Sif og í dag ætla ég að segja ykkur frá skóla og kennsukerfinu í Frakklandi, við ætlum að skoða uppbygginguna...."

Eins gott að Arnar var sofandi.

Vaknaði upp við drauminn um að stæði fyrir framan nemendurna og væri að tala ofboðslega flotta frönsku og það gengi vel, en ég hafði óvart byrjað að tala um tónlist, einhverja hljómsveit, í staðinn fyrir skólakerfið. Var að reyna að finna lausn á því hvernig ég myndi snúa mig úr þessu og komast til baka í umræðurnar sem ég átti að vera með. Úff!

Þar á undan vaknaði ég því að mér fannst eins og að vekjaraklukkan væri búin að hringja og mig var að dreyma að ég væri að snooza en þyrfti að fara að koma mér fram úr svo ég gerði það kl 06 en áttaði mig svo á því að það hafði engin klukka hringt. Þetta er farið að koma oft fyrir mig!

Og já, ég er stressuð. Ég er að leika kennarann minn í dag. Á að tala alveg heillengi en hann miðar allavegana við hálftíma, guð gefi að það verði svarað spurningunum mínum og ég geti virkjað samnemendur mína því það var eitt af því sem ég átti að gera, fá þá til að vera með í umræðum en ekki flytja einfaldan fyrirlestur. Mamma mía!

Rushes

2005-10-23T18:46:00.000Z

Airwaves búið, eða svo gott sem. Skilst að það séu einhverjar leifar í kvöld en ætla að láta þetta gott heita og sinna skólanum og heimilinu í kveld.

Þetta var ansi ljúf hátíð, gerði þetta svona hægt og hljótt, datt ekki í það með öllum hinum en hypaði mig upp af þremur expressó bollum á föstudagskvöldinu. Það hélt mér í gírnum. Sá skemmtilegar hljómsveitir. Apparat Organ Quartet, Stórsveit Nick Noltes, Unsound, Au Revoir Simone, Jeff Who, Helga Val, Idis, Láru og Rushes. Ætlaði að sjá Juliette og Hjálma en raðirnar bjóða ekki upp á það. Sendi hér með kvörtun mína út í netheima um það hversu margir miðar voru seldir, og hversu margar raðir voru allan tímann. Ef maður komst inn þá gat maður ekkert flakkað á milli staða því að þá lenti maður í röðum sem hreyfðust ekki neitt. Fattaði það þegar að ég gaf mér 40 mín fyrir röðina á Juliette en þegar að hún var að byrja var ég ekki komin hálfa leið inn og löng röð komin meira að segja VIP megin. Sneri við á Nasa en þar var auðvitað jafn löng röð og því varð maður hreinlega frá að snúa. Soldið svekkelsi.

Uppáhalds hljómsveitin er Rushes, komu á óvart og það var lítill breskur Kristján Blöndal sem spilar á píanóið í þeirri grúppu. Líkindin eru ótrúleg. Þetta var æðislega notalegt kvöld á Þjóðleikhúskjallaranum, sæti við borð við sviðið og hægt að njóta þess að hlusta á góða söngvara. Kvöldið byrjaði á Halleluja í flutningi Helga Vals sem sendi gæsahúð niður eftir bakinu og endaði á Rushes sem fékk mig til að dilla tánum.

Notalegur sunnudagur, tiltektir, lærdómur og sjónvarpsgláp. Eldaði grænmetissúpu handa mér og Arnari, full af engifer og hvítlauk til að gefa okkur kraft fyrir vikuna og sit nú í kertaljósi yfir lærdómi, er að stúdera franska menntaveginn því ég ætla að fræða meðstúdentínur mínar um það því kennarinn minn nennir ekki að þenja raddböndin í næsta tíma. Hann er einn af þessum meðvituðu kennurum sem vill ekki vera einræðisherra og vill alls ekki skapa of mikið af bóklegu umhverfi. Hann er hrifnastur af svona litlum umræðum, leikritum og talar mikið um að setja hlutina á svið. Mjög fyndinn og ég bauð mig fram því hann er krútt og ég er meðvirk!

Íslenskar loftbylgjur

2005-10-21T16:54:00.000Z

Fór á Appart í gær í Hafnarhúsinu. Apparat var miklu þyngri en ég hélt að þeir væru, fílaði eiginlega bara tvö lög af þeim 5 sem þeir spiluðu en það var gaman að vera þarna, flottur tónleikastaður. Svo er svo ótrúlega gaman að skoða fólk.

Er að fara í útgáfuboð og svo meira Airwaves, ætla nú að reyna að vera duglegari í kvöld, er ekki búin að sjá marga tónleika!

Ævintýri

2005-10-20T09:02:00.000Z

Að borða á Svjávarkjallaranum er eins og að upplifa lítið ævintýri. Við fengum Chefs menu, bland ýmissa rétta á borðið og þvílíkt og annað eins! Í gær smakkaði ég kengúru og dúfu ásamt ýmsu öðru. Kengúran kom í salati sem lá í skál ofan á þurrís sem gerði svona gufu frá sér, ótrúlegt alveg. Réttirnir voru hver öðrum betri, sashimi, lax, humar o.s.fr. Allt borið fram á mismunandi diskum í mismunandi lögum með mismunandi sósum og þetta var bara svo mikil snilld. Var hálf leið því að Arnar gat ekki komið með en við förum aftur, ekki spurning!

Minna ævintýri er að fara á Iceland Airwaves. Fyrsta lagi, hvað kom fyrir fólk? Það eru allir svo rosalegar týpur eitthvað að þau eru öll eins. Sá 15 stráka með eins hárgreiðslu og stelpurnar alltaf í eins skóm. Ekki það, ógeðslega smart en þetta var eiginlega eins og að vera á tískusýningu frá Spútnik. En svo var löng röð fyrir utan alla staðina þannig að við ákváðum að vera bara á Nasa þar til Annie byrjaði sem var auðvitað afspyrnuslæm ákvörðun þar sem það var eitthvað elektró í gangi þar. Ég veit að það heitir elektró því ég spurði Arnar, ég hef tilhneigingu til að kalla alla svona tölvutæknitónlist teknó. Það er í mínum huga það versta sem hægt er að segja, að kalla tónlist teknó en fólkið í kring var heldur betur að fíla þetta, sumir dönsuðu, aðrir sögðu að þetta væri snilld. Tók það sem merki um elli mína. Allavegana þá gáfumst við upp á biðinni eftir Annie minni og fórum heim. Synd og skömm því ég hefði virkilega viljað sjá hana.

Jóla hvað?

2005-10-19T16:32:00.000Z

Ójá, jólaskreytingarnar eru að koma upp, jólaskrautið komið til sölu í búðunum og nú vantar ekki nema að bíða ca 66 daga og þá koma loksins jólin. Sjibbý.
Nema hvað, það hættir að hljóma spennandi þegar ég hugsa um allt það sem ég þarf að gera áður en þau koma, þá fyllist ég ótta og vona að tíminn líði eins hægt og mögulega er!
Afhverju vildi ég endilega vinna og vera í fullu námi og sjá um nemendafélagið? Afhverju gat ég ekki reynt að vera raunsæ einu sinni og kveikja á perunni með það að Súperman er ekki til í alvörunni? Æjá, svona er þetta bara stundum. Einn daginn langar mig til að vera bara að vinna og hinn langar mig til að mennta mig í mörg mörg ár. Til að fá það besta af báðu ákvað ég auðvitað að það væri lógískt að taka bara bæði í einu en það gerir það helmingi erfiðara að njóta. Tuði lokið!

Í aften er það Sjávarkjallarinn í góðum og gáfuðum félagsskap. Svo skal haldið á upphaf Airwaves, ætla að reyna að þrauka til miðnættis og sjá þá Annie frá Noregi.....finnst hún hljóma mjög svo spennandi.

Umræður glæpasagnahöfunda fimmtudagskvöld kl. 20.00

2005-10-19T11:46:00.000Z

Í tilefni af heimsókn norska rithöfundarins Tom Egelands, höfundar spennubókarinnar Við enda hringsins, sem er nýkomin út hjá JPV útgáfu efna JPV Útgáfa, Hið íslenska Glæpafélag og Penninn – Eymundsson til umræðna um glæpi og glæpasögur í Pennanum-Eymundsson,

Austurstræti, fimmtudagskvöldið 20. október kl. 20.00.

Þátttakendur eru:

Tom Egeland

Árni Þórarinsson

Þráinn Bertelsson

Súsanna Svavarsdóttir

Katrín Jakobsdóttir stýrir umræðunum.

Allir velkomnir meðan húsrúm leyfir.
-----------------

ALLIR MÆTA
http://www.jpv.is/index.php?page=1&post=1374

2005-10-13T19:17:00.000Z

Undarleg vika sem er að líða undir lok. Er búin að vera að halda fast í litla skýið sem ég hef setið á eftir Parísarferðina. Hef ekki viljað setja tána einu sinni út fyrir það en þó er brýn þörf. Alvara lífsins er svo sannarlega tekin við, nóg að gera í vinnu og skóla.

Hlakka til að hitta allt skemmtilega fólkið annað kvöld. Fór í Ríkið áðan með afmælisbarni dagsins og fjárfesti í efnivið í bollu. Minnið mig á það afhverju áfengi er svona dýrt á Íslandi? Getur einhver útskýrt fyrir mér afhverju flaska af Smirnoff kostar 1.690 kr á flugvellinum en heilar 4.180 kr í ÁTVR? Ég tek svo lítið eftir þessu því ég er alltaf í bjórnum, kaupi eiginlega aldrei sterkt og bjórinn er alveg á þolanlegu verði en það er meiriháttar fjárfesting að kaupa flösku.

Ætla að fara og brjóta saman þvott.