Hugsanaflækja

Í andyrri bókhlöðunnar situr lítill rauður kisi, hann er búinn að finna sér litla rist þar sem heitt loft kemur upp og liggur þar í makindum sínum á hverjum morgni þegar ég kem hingað. Hann er ótrúlegt krútt.

Ég er búin að koma mér ágætlega fyrir á borði í á fjórðu hæð og hef verið að rifja upp ýmislegt um hin ýmsu héruð Frakklands. Einhver snillingur skildi svo símann sinn eftir (ekki á silent) og fór í mat, nema hvað að síminn hringdi stanslaust og greinileg að mismunandi hringingar voru tengdar við mismunandi fólk því að það hljómuðu um gangana fjögur mismunandi lög og þess á milli sendi hann frá sér einhver fuglahljóð (tilkynning um missed call). Þetta hefur vakið mismikla lukku meðal manna en allir snúa sér við, andvarpa eða sýna einhver viðbrögð og mér finnst þetta svo ótrúlega fyndið, það eru allir svo ótrúlega alvarlegir hérna. Ég get bara varla einbeitt mér að lærdómnum því ég er komin í það að fylgjast með fólkinu í kringum mig....ojæja!

Og svo var bara eldur í Nóatúni í JL húsinu. JPV er með lagerinn sinn staðsettan fyrir aftan JL húsið og hefur verið þar í þrjú eða fjögur ár. Svo skal það ekki bregðast að í jólavertíð brennur eitthvað í nágrenni við lagerinn okkar. Fyrstu jól JPV Útgáfu kom upp mikill eldur í Lýsishúsnæðinu sem er nánast samtengt lagernum. Það myndaðist sprengihætta og bókunum okkar var vart hugað líf. Við vorum því klukkan sex um morguninn hlaupandi eins og óðir menn með fangið fullt af bókum í hina ýmsu bíla, til að bjarga því sem bjarga yrði (þá var ekki búið að kaupa brunatryggingu og lífsviðurværi fjölskyldunnar þarna inni). Það var sprengihætta og við máttum eiginlega ekki vera á svæðinu en slökkviðliðsmennirnir sáu aumur á okkur. Við vorum búin að fylla tvo vörubíla af bókum þegar að þeir náðu tökum á eldinum og ljóst var að hann myndi ekki breiðast út. Ég ætla ekki að lýsa léttinum sem færðist yfir okkur fjölskylduna þar sem við burðuðumst með kassana aftur inn á lagerinn og fórum svo og keyptum tryggingu. Þetta var fyrsta árið og það var nú verst en hin árin hefur samt komið upp einhver svona bruni í næsta nágrenni við lagerinn. 7,9,13!

10 dagar eftir í prófum.....get ekki beðið. Þess má einnig geta að í dag eru 4 ár síðan að ég kom heim frá Frakklandi!